Media

Media

Salamworld.com İdarə Heyəti sədrinin müavini: “Biz “Facebook”dan daha artığını təklif edəcəyik” – MÜSAHİBƏ

Salamworld.com İdarə Heyəti sədrinin müavini: “Biz “Facebook”dan daha artığını təklif edəcəyik” – <font color=red>MÜSAHİBƏ</font>

23 noyabr 2011 11:09 (UTC +04:00)

Bakı. Habil Süleymanzadə, Pərvin Abbasov - APA. “Salamworld” (“salamworld.com”) şirkəti İdarə Heyəti sədrinin müavini Aydarbek Xocanazarovun APA-ya müsahibəsi.

- Gələn ay internet aləmində ilk qlobal islam layihəsi adlandırılan salamworld.com saytının fəaliyyətə başlayacağı gözlənilir. İndi sizin layihənizi bəzilər hətta islam aləminin “Facebook”u da adlandırır. Bu layihənin təşəbbüskarlarından biri kimi onun məqsədi və hədəfləri barədə bizə qısa məlumat verə bilərsinizmi?

- Bizim layihəni bəzən “Facebook”la müqayisə etsələr də, biz yalnız sosial şəbəkə olmaq niyyətində deyilik. Təbii ki, biz həm də sosial ünsiyyət platforması olmaq əzmindəyik. Geniş anlamda isə qlobal müsəlman şəbəkəsi olmaq niyyətindəyik. İslam dəyərləri ilə bölüşən insanları bir araya gətirmək, ünsiyyətə zəmin hazırlamaq, müxəlif mədəniyyət təmsilçiləri arasında əlaqə qurmağa yardımçı olmaq istəyirik. Bu, qeyri-rəsmi və qeyri-hökümət təşəbbüsüdür və zənnimizcə, bunun təsiri dərin olmalıdır. Biz “Facebook”dan daha artığını təklif edəcəyik. İlk öncə ünsiyyət problemini aradan qaldırmağı hədəfləyirik. Misal üçün, Türkiyədəki hər hansı şəxs İndoneziyadakı tanışına məktub yazmaq istəyir. Amma onlardan heç biri ingilisçə bilmir. Bizim sayt türkcə yazılmış bir məktubu dərhal İndeoneziya dilinə tərcümə edib ünvanına çatdırlmasını təmin edəcək. Yaxud deyək ki, hər hansı bir müsəlman ziyarətçi istənilən Avropa şəhərində halal restoran, məscid və ya icma tapmaq istəsə, bunu rahatlıqla bizim sayt vasitəsilə edə biləcək. Saytımızdakı xüsusi xəritə xidməti buna imkan yaradır.

- Saytın hansı dillərdə fəaliyyət göstərməsi nəzərdə tutulur?

- Saytımız ilk mərhələdə 6 dildə, o cümlədən türk, ərəb, rus və ingiliscə fəaliyyət göstərəcək. Daha sonra dillərin sayını 9-a çıxarmaq fikirindəyik. Bundan başqa, artıq dediyim kimi, elektron tərcümə xidmətimiz ünsiyyət problemini aradan qaldıracaq. Ümid edirik ki, bizim təklif edəcəyimiz xidmətlər həqiqətən də qlobal platforma kimi çıxış etməyimizə imkan verəcək.

- Yəqin razılaşarsınız ki, bu cür qlobal internet layihələri müəyyən maliyyə də tələb edir. Bu məsələni necə yoluna qoymusunuz?

- Bizim təşəbbüsə artıq 15 ölkə cəlb edilib. Açığını etiraf edim ki, daha öncə bizə bir-iki sanballı təklif var idi və böyük pullar belə vəd edilmişdi, amma biz dar çərçivəli qrupdan asılı olmamaq üçün fərqli sxemə üstünlük verdik. Bizim səhmlər təqribən bərabər bölünüb və bir əldə 5 faizən artıq səhm olmamaq şərtilə səhmlər paylanılıb. Bu, özəl kommersiya qrupları və ayrı-ayrı fərdlərdir. Burada hökümətlər təmsil olunmur. Biz gəlir ummuruq və dotasiya əsasında işləmirik. Biz müstəqilik və beynəlmiləl, qlobal bir internet-layihə hədəfləyirik. Yaxın 3 il üçün büdcəmiz 50 milyon dollar təşkil edir. İdarə Heyətimiz kollektiv bir məşvərətçi orqandır. Belə bir sxem bizi bir nəfərdən asılı düşməkdən və “cib” layihəsi olmaqdan sığortalayır.

- Bütün bu fəaliyyət hardan idarə olunacaq?

- Mərkəz qismində İstanbulu seçmişik və bunun bir neçə səbəbi var. Zənnimizcə, İstanbul islam şəhərləri arasında informasiya-kommunikasiya texnologiyalarının inkişafı baxımından öndə gedən bir şəhərdir. Şəhər iki qitənin qovşağında qərar tutub. Bundan başqa, Türkiyə bir çox ölkələrlə vizasız gediş-gəliş rejiminə malikdir. Bütün qeyd olunan məqamlar İstanbulu bir mərkəz qismində seçməyimizi şərtləndirib.

- İnformasiya texnologiyaları sahəsində qlobal platforma yəqin ki, ciddi təhlükəsizlik tədbirlərini də zəruri edir. Mümkün rəqib və əlehdarlarınızın kiber hücumlarından sığortalanmısınızmı?

- Təbii ki, biz bu barədə düşünmüşük. Şirkətimiz çərçivəsində çox güclü informasiya-texnologiya bölməsi təsis edilib və burada öz işinin peşəkarlarını bir araya gətirdiyimizə inanırıq. Bizim büdcəmizin bir xeyli hissəsi də məhz informasiya-texnologiya sahəsinə yönəlir. Düşünürəm ki, bu sahədə etibarlı şəkildə müdafiə olunacağıq.

- Layihə çərçivəsində Azərbaycanla bağlı hansı fikirləriniz var?

- Azərbaycan bizim diqqətimizdən kənarda qalmayacaq. İdarə Heyətimizdə Azərbaycandan olan nümayəndəmiz də var - Elşad İsgəndərov. Heyətdə təmsil olunan hər bir ölkə nümayəndəsi kimi, Azərbaycanın da ümumi işə töhfə verəcəyinə şübhə etmirəm. Azərbaycan mühüm regionda yerləşir və burada dinamik dəyişikliklər baş verir.