Media

Media

Mətbuat Şurası Rafiq Tağının vəfatı ilə bağlı nekroloq yayıb

23 noyabr 2011 14:25 (UTC +04:00)

APA-ya daxil olan nekroloqda deyilir ki, tanınmış yazıçı, jurnalist Rafiq Tağı bu gün günorta radələrində dünyasını dəyişib: “Dörd gün idi ki, onun həyatı uğrunda mübarizə gedirdi. Lakin amansız ölüm səhiyyə mütəxəssislərinin bütün səylərindən üstün oldu. İstedadlı qələm sahibi yaradıcılığının çiçəkləndiyi vaxtda - 61 yaşında əbədiyyətə qovuşdu”.
Rafiq Tağı 5 avqust 1950-ci ildə Masallı rayonunun Xoççobanlı kəndində dünyaya gəlib. R.Tağı həkim olmaq niyyəti ilə 1972-ci ildə Azərbaycan Dövlət Tibb Universitetinin müalicə-profilaktika fakültəsini bitirmişdi. İ.M.Seçenov adına I Moskva Tibb İnstitutunun daxili xəstəliklər üzrə klinik ordinaturasında ixtisasını təkmilləşdirmişdi. Topladığı təcrübə və biliklər sayəsində Sabirabad rayonunun Yolçubəyli kənd ambulatoriyasının, Masallıdakı Həsənli kənd xəstəxanasının baş həkimi kimi neçələrinin şəfa tapmasına yardımçı olmuşdu. Ömrünün 11 ilini Rusiya Federasiyasının Moskva şəhəri və Kalinin vilayətindəki səhiyyə müəssisələrində həkim kimi insanların sağlamlığına həsr edən R.Tağı 1990-cı ildən həyatının sonuna kimi Bakı şəhəri Təcili və Təxirəsalınmaz Tibbi Yardım Stansiyasında, paralel olaraq Mərdəkan qəsəbəsində yerləşən “KM” Müayinə-Müalicə Mərkəzində çalışıb.

Onun adı ictimaiyyətə yazıçı, jurnalist və publisist kimi daha yaxından tanış idi. Bədii əsərləri Masallının “Çağırış” qəzetində, “Ulduz” jurnalında və çoxsaylı kütləvi informasiya vasitələrində dərc olunmuşdu. Yaradıcılığına özünəməxsus orijinal yol və üslub xas idi. Yazıları bir qayda polemika doğururdu. Azərbaycan Mətbuat Şurası Rafiq Tağının vaxtsız vəfatından kədərlənir, mərhumun ailəsinə və bütün doğmalarına dərin hüznlə başsağlığı verir.

“APA-Group” da yazıçının vəfatı ilə bağlı onun ailəsinə və yaxınlarına dərin hüznlə başsağlığı verir. Allah rəhmət eləsin!

Rafiq Tağı _ nekroloq