Media

Ana səhifə

Media

Mətbuat Şurası İdarə Heyətinin iclası keçirilib - FOTO

Mətbuat Şurası İdarə Heyətinin iclası keçirilib - <font color=red>FOTO</font>

02 dekabr 2011 12:52 (UTC +04:00)

Bakı-APA. Azərbaycan Mətbuat Şurası (MŞ) İdarə Heyətinin (İH) iclası keçirilib. Şuradan APA-ya verilən məlumata görə, iclasda Azərbaycanın tanınmış ictimai-siyasi xadimi və publisisti, respublikanın əməkdar jurnalisti Nəsrulla Əsəd oğlu İmanquliyevin anadan olmasının 100 illik yubileyinin qeyd edilməsi barədə müzakirələr aparılıb. MŞ sədri Əflatun Amaşov milli jurnalistikanın təşəkkülündə rolu olan, mətbuatın inkişafında əvəzsiz xidmətlər göstərən bu insanın yubileyinin yüksək səviyyə keçirilməsi üçün Azərbaycan prezidenti İlham Əliyev tərəfindən sərəncam imzalandığını nəzərə çatdırıb.

Çıxışlarda N. İmanquliyevin Azərbaycan jurnalistlərinin böyük bir nəslini yetişdirən, sanballı yazıları ilə mətbuat tariximizə misilsiz töhfələr verən şəxsiyyət olduğu qeyd edilib. Bildirilib ki, onun redaktoru olduğu “Bakı” və “Baku” qəzetləri isə günümüzə də örnək sayıla biləcək məktəbdir. İH üzvləri bütün bunları nəzərə alaraq Şuranın “Nəsrulla İmanquliyev irsi və müasir jurnalistikamız” adlı konfransın keçirilməsini qərara alıblar.

İclasda İH üzvləri başa çatmaqda olan ilin yekunları ilə bağlı hesabatın hazırlanmasının Şura sədrinə həvalə ediblər.

Sonra MŞ-nin “Reket jurnalistika”ya qarşı mübarizə Komissiyanın sədri, “İki sahil” qəzetinin baş redaktoru Vüqar Rəhimzadə çıxış edib. O bildirib ki, komissiyanın dekabrın 1-də keçirilən iclasında 8 qəzetlə bağlı məsələyə baxılıb. Onlardan ikisinin fəaliyyətində peşə prinsipləri ilə bir araya sığmayan hallar qabarıq nəzərə çarpdığından belə rəyə gəlinib ki, onların “reket nəşr” elan olunaraq Şuranın “qara siyahı”sına daxil edilməsi üçün ciddi əsaslar mövcuddur və bu nəzərə alınaraq İdarə Heyətinə təqdimat verilməlidir.
İH üzvləri çıxışlarında hər iki nəşr barədə oxşar fikirlərin MŞ-nin Şikayətlər üzrə Komissiyasının da rəylərində ifadəsini tapdığını vurğulayıblar. Qərara alınıb ki, Salyan Rayon İcra Hakimiyyətinin və Azərbaycan Müəllimlər İnstitutunun Qazax filialının “Polit press”, Ağdam Rayon Əhalinin Sosial Müdafiə Mərkəzinin və həmin rayondakı Sukanal İdarəsinin “Yeni axtarış” qəzetləri barədə şikayətləri, həmçinin komissiyanın qərarları əsas götürülərək hər iki kütləvi informasiya vasitəsi “reket nəşr” elan olunsun və adları Şuranın “qara siyahı”sına daxil edilsin.

İH üzvü, Jurnalistlərin Həmkarlar İttifaqının sədri Müşfiq Ələsgərli başçılıq etdiyi Şikayətlər üzrə Komissiyanın son rəyləri barədə məlumat verib. Daxil olan müraciətlərə əsasən “7gun.az” Xəbər Saytına xəbərdarlıq olunub. Onun baş redaktoru Cavid Şirəliyevə Xəbər Saytının fəaliyyətində dönüş yaratmaq tövsiyə edilib.

“Poliqon” Analitik İnformasiya Agentliyinin Azərbaycanlıların və Digər Türkdilli Xalqların Əməkdaşlıq Mərkəzinin sədri İlham İsmayılov barədə təqdim etdiyi materialda da “Azərbaycan Jurnalistlərinin Peşə Davranışı Qaydaları”nın bir sıra bəndlərinin tələblərinə sayğısızlıq göstərildiyi MŞ qərarında yer alıb. Agentlik rəhbərliyinin nəzərinə çatdırılıb ki, bu cür təqdimat etik prinsiplərlə qətiyyən bir araya sığmır və gələcəkdə təkrar olunacağı təqdirdə onun barəsində daha ciddi ölçü götürülə bilər.
İclasda Şura sıralarına daha üç yeni üzv (“Discovery Azerbaijan” jurnalı, “Yeni liqa” qəzeti, “Tele-inform” Xəbərlər Mərkəzi) qəbul olunub.

Mətbuat Şurası