Media

Ana səhifə

Media

İsmayıllı rayonunda “Jurnalistlər üçün qış məktəbi”nin açılış mərasimi keçirilib - FOTOSESSİYA

İsmayıllı rayonunda “Jurnalistlər üçün qış məktəbi”nin açılış mərasimi keçirilib - <font color=red>FOTOSESSİYA</font>

08 dekabr 2011 09:08 (UTC +04:00)

APA-nın məlumatına görə, Gənclər və İdman Nazirliyinin dəstəyi ilə keçirilən tədbirin açılış mərasimində ARGTMŞ sədri, millət vəkili Fuad Muradov, İsmayıllı Rayon İcra Hakimiyyətinin başçısı Nizami Ələkbərov, “APA Group”-un baş direktoru Vüsalə Mahirqızı, Bakı Dövlət Universitetinin jurnalistika fakültəsinin müəllimləri Cahangir Məmmədli və Zaur Babayev, müxtəlif mətbuat orqanlarını təmsil edən jurnalistlər iştirak ediblər.

Tədbirdə çıxış edən N. Ələkbərov İsmayıllı haqqında ətraflı məlumat verib, rayonun coğrafi mövqeyindən, demoqrafik vəziyyətindən danışıb. İcra başçısı deyib ki, hazırda rayonda iki qəzet dərc edilir və bu qəzetlər mövzularına, əhatə dairəsinə, obyektivliyinə görə fərqlənir. Rayonda üzümçülük sahəsinin yenidən bərpa olunduğunu söyləyən N. Ələkbərov, Lahıc qəsəbəsinə yeni yol çəkildiyini və bu yolun növbəti il üçün istifadəyə veriləcəyini açıqlayıb: “Respublikada ilk dəfə məhz bizim rayonumuzda yapon bağı salınıb. İvanovkada çörək zavodu tikilir və fəaliyyətə başladıqdan sonra İvanovka çörəklərinin Bakıya göndərilməsi də nəzərdə tutulur. Rayonumuzda turizm sahəsində də hər il irəliləyiş hiss olunur”.

ARGTMŞ-nın sədri, millət vəkili Fuad Muradov bu layihəyə 2009-cu ildə Quba rayonunda start verildiyini deyib: “İnkişaf edən ölkəmizdə, cəmiyyətimizdə bu cür layihələr xüsusi əhəmiyyət daşıyır. Layihəni həyata keçirdiyimiz ilk ildən etibarən bir sıra jurnalist dostlarımız bizə dəstək oldular. Fikrimcə, bu gün Azərbaycan jurnalistləri tərəfindən ərazi bütövlüyü məsələsi gündəmdə saxlanılmalıdır. Hər il bir neçə dəfə bu layihənin həyata keçirilməsini nəzərdə tuturuq. Bu cür görüşlərdə mövcud problemləri birgə həll etməliyik. Bu addımımız jurnalist hərəkatına bir dəstəkdir. Hər kəs üzərinə düşəni etsə, problemlər də öz həllini tapacaq”.

“APA Group”-un baş direktoru Vüsalə Mahirqızı layihənin əhəmiyyətindən danışıb, “Jurnalistlərin Qış Məktəbi”nə uğurlar arzulayıb: “Gələcəkdə belə toplantılarda digər baş redaktorların da iştirakı yaxşı olardı. Redaktorlar olaraq biz bu tədbirlərdən faydalanırıq. Fikrimcə, bu tipli layihələri digər qurumların da həyata keçirməsi təqdirəlayiq olardı. Bu, ümumi işimizin xeyrinədir, jurnalistlərin bu layihədən faydalanacağına inanıram”.

Açılış mərasimində BDU-nun müəllimləri Cahangir Məmmədli, Zaur Babayev, Avrasiya Fondunun nümayəndəsi Zümrüd İsmayılova, Parlament Jurnalistləri Birliyini sədri Elşad Eyvazlı da layihəyə uğurlar arzulayıblar.

Dekabrın 10-na kimi davam edəcək layihə çərçivəsində “Jurnalistikada informasiyanın təqdimat prinsipləri: dəqiqlik, qərəzsizlik, vicdanlılıq, ədalətlilik”, “Yeni media şəraitində jurnalistin peşəkarlıq səviyyəsi”, “Avropaya inteqrasiya: Avropa dəyərləri nədir?”, “Media hüququ və Azərbaycan gerçəkliyi”, “Fotojurnalistika və Azərbaycan reallığı”, “Qarabağ problemi Azərbaycan mətbuatında”, “Bloqgerlik və sosial jurnalistika” mövzuları ətrafında peşəkar təlimçilər tərəfindən jurnalistlərə məlumatlar veriləcək. Həmçinin müxtəlif qrup işləri, əyləncəli intellektual oyunlar təşkil edilməklə jurnalistlərin asudə vaxtlarının səmərəli keçirilməsi təmin olunacaq. Layihənin sonunda iştirakçılar ARGTMŞ tərəfindən diplom və hədiyyələrlə təltif ediləcəklər.