Media

Ana səhifə

Media

KİVDF Yasamal rayon İcra Hakimiyyəti ilə birgə tədbir keçirib

08 dekabr 2011 11:14 (UTC +04:00)

Bakı. Rəşad Süleymanov – APA. Azərbaycan Prezidenti yanında KİV-in İnkişafına Dövlət Dəstəyi Fondu (KİVDF) Yasamal rayon İcra Hakimiyyəti ilə birgə tədbir keçirib. APA-nın məlumatına görə, tədbirdə çıxış edən Yasamal rayon icra hakimiyyətinin başçısı İbrahim Mehdiyev Azərbaycan mətbuatının 131 il ərzində böyük inkişaf yolu keçdiyini deyib. Onun sözlərinə görə, senzuranın aradan qaldırılması müstəqil mətbuatın inkişafına təkan verib.

KİVDF-nin icraçı direktoru Vüqar Səfərli son illər Azərbaycanda mətbuatın inkişafına dövlət qayğısından danışıb. V. Səfərli 2009-cu ildən başlayaraq dövlət büdcəsindən hər il mətbuata yardım göstərilməsi üçün ayrılan vəsaitin artdığını deyib.

“Bu gün ölkədə 5 minə yaxın KİV dövlət qeydiyyatından keçib. Qeydiyyat prosedurası asanlaşıb, dövlət tərəfindən hər il jurnalistlərə və mətbu orqanlara yardımlar göstərilir”, - deyə V. Səfərli əlavə edib.

Mətbuat Şurasının sədri Əflatun Amaşov isə yerli icra nümayəndələrini yazılarına görə jurnalistləri məhkəməyə verməməyə çağırıb. Ə. Amaşov öncə Mətbuat Şurasına müraciət olunmasını tövsiyə edib. Onun sözlərinə görə, hər il Mətbuat Şurasına minədək şikayət daxil olur və bu şikayətlər araşdırılır.

Daha sonra Mətbuat Şurasının “reket” nəşrlərlə mübarizə üzrə komissiyasının rəhbəri Vüqar Rəhimzadə bu tip mətbu orqanlarla mübarizə sahəsində görülən işlərdən danışıb. V. Rəhimzadə qeyd edib ki, artıq 89 qəzet Şuranın “qara siyahısı”na daxil edilib.

Tədbirdə mətbuat rəhbərlərinin və icra strukturlarının nümayəndələrinin əməkdaşlığın genişləndirilməsi istiqamətində təklifləri dinlənilib, problemlərdən çıxış yolları aranıb.