Media

Ana səhifə

Media

İsmayıllıda keçirilən “Jurnalistlər üçün qış məktəbi”nə yekun vurulub

10 dekabr 2011 09:50 (UTC +04:00)

Fuad Muradov: “Biz mütləq şəkildə bu işləri davam etdirmək istəyindəyik və çalışacağıq ki, burada iştirak edən jurnalistlərin təcrübəsindən yararlanaq”

İsmayıllı. Ülkər Qasımova-APA. Bu gün İsmayıllı rayonunda Gənclər Təşkilatları Milli Şurasının (ARGTMŞ) təşəbbüsü, Gənclər və İdman Nazirliyinin, Avrasiya Əməkdaşlıq Fondunun dəstəyi ilə 22 KİV təmsilçisinin iştirak ilə “Jurnalistlər üçün qış məktəbi”nə yekun vurulub. APA-nın məlumatına görə, məktəbin sonuncu günü ARGTMŞ-nın sədri, millət vəkili Fuad Muradov Avropa Birliyi, Avropa Şurası və Avropa Parlamentinin strukturu və fəaliyyəti barədə haqqında ətraflı məlumat verib. Millət vəkili eləcə də Avropa Şurasında mövcud olan Dağlıq Qarabağ üzrə Alt Komitənin gələcəyindən də danışıb: “Bu Alt Komitənin aktiv fəaliyyət göstərməsi, işə başlaması üçün Avropa Şurasının sərt mövqeyi lazımdır. Ermənilər çalışır ki, bu məsələ gündəmdə olmasın və yaddan çıxsın. Amma bu olacaq və qaçılmaz bir şeydir”.

F. Muradov eləcə də başa çatmaqda olan “Jurnalistlərin qış məktəbi”ndən əldə olunan nəticədən də danışıb. O bildirib ki, təşkilatçı olaraq nəzərdə tutulan gözləntinin əldə olunduğunu hesab etmək olar: “Məqsədimiz ondan ibarət idi ki, buraya gələn qonaqlarımız, məruzəçilərimiz, ekspertlər gözləntiləri doğrultsunlar. Eyni zamanda artıq gələcək planlarımızı da müəyyənləşdirə bildik. Biz mütləq şəkildə bu işləri davam etdirmək istəyindəyik və çalışacağıq ki, burada iştirak edən jurnalistlərin təcrübəsindən yararlanaq. Fikrimcə, bu dəfəki layihə ötən layihədən daha da dinamikliyi ilə seçildi. Bu da yeni iştirakçıların olması ilə bağlıdır”. Millət vəkili ölkədə jurnalistikaya fərqli yanaşmalar olduğunu vurğulayıb və yaşından, fikirlərindən asılı olmayaraq artıq ölkəmizdə peşəkar jurnalistika ordusunun inkişaf etdiyini deyib.

“Jurnalistlər üçün Qış Məktəbi”ndə “AG Bank”ın nümayəndəsi, eləcə də AŞPA-da Azərbaycan nümayəndə heyətinin sabiq üzvü Əkrəm Abdullayev beynəlxalq təşkilatların fəaliyyəti ilə bağlı təcrübəsini bölüşüb.

“Jurnalistlər üçün Qış Məktəbi”nin sonuncu məruzəçi blogger, təlimçi Rəşad Əliyev olub. O, “Blogerlik və sosial jurnalistika” mövzusunda fikirlərini jurnalistlərlə bölüşüb.

Qeyd edək ki, 7-10 dekabr tarixlərində İsmayıllıda keçirilən layihə çərçivəsində “Jurnalistikada informasiyanın təqdimat prinsipləri: dəqiqlik, qərəzsizlik, vicdanlı, ədalətli”, “Yeni media şəraitində jurnalistin peşəkarlıq səviyyəsi”, “Avropaya inteqrasiya: Avropa dəyərləri nədir?”, “Media hüququ və Azərbaycan gerçəkliyi”, “Fotojurnalistika və Azərbaycan reallığı”, “Blogerlik və sosial jurnalistika” və digər mövzular ətrafında peşəkar təlimçilər tərəfindən jurnalistlərə məlumatlar verilib. Müzakirələrdə millət vəkili Fuad Muradov, “APA Group”un baş direktoru Vüsalə Mahirqzı, BDU-nun jurnalistika fakültəsinin müəllimləri Cahangir Məmmədli və digərləri iştirakçılarla bilgilərini bölüşübülər. Tədbir çərçivəsində müxtəlif əyləncəli intellektual oyunlar təşkil edilməklə jurnalistlərin asudə vaxtlarının səmərəli keçirilməsi təmin olunub. Layihənin nəticəsi olaraq ARGTMŞ tərəfindən iştirakçılara diplomlar veriləcək.