Media

Ana səhifə

Media

“Azərbaycanda jurnalistlərin həmkarlar hərəkatının durumu və gələcək inkişafı” mövzusunda beynəlxalq konfrans keçirilib

16 dekabr 2011 10:24 (UTC +04:00)

APA-nın məlumatına görə, tədbirdə mətbuat orqanlarının rəhbərləri, Həmkarlar İttifaqları Konfederasiyasının nümayəndələri və Beynəlxalq Jurnalistlər Federasiyasının üzvləri iştirak ediblər. Konfrans Avropa İttifaqının Azərbaycan nümayəndəliyi və İsveçin LO-TCO təşkilatı tərəfindən dəstəklənən “Etik Jurnalistika Təşəbbüsləri-Azərbaycan” layihəsi çərçivəsində təşkil olunub.

Layihənin koordinatoru Müşfiq Ələsgərli bildirib ki, tədbirin əsas məqsədi Jurnalist Həmkarlar Təşkilatının son durumu və gələcək perspektivlərinin müzakirəsidir: “Jurnalist Həmkarlar Təşkilatı hər il jurnalistlərin sosial durumları barədə məlumat verir, bu məqsədlə müxtəlif sorğular keçirir, mövcud problemlərin aradan qaldırılması üçün müəyyən tədbirlər reallaşdırır. Bu məqsədlə biz müəyyən təkliflər hazırlayırıq. 2009-cu ildən bu yana jurnalistlərin sosial durumlarının yaxşılaşdırılması üçün müəyyən işlər görülüb. Bu, əmək müavinətlərinin artırılmasında, əmək müqavilələrinin bağlanmasında kifayət qədər özünü göstərib. Ancaq buna baxmayaraq, problemlər yenə də var. Jurnalistlərin sosial durumlarının yaxşılaşdırılması üçün tədbirləri davam etdirəcəyik”.

Prezident Administrasiyası ictimai-siyasi şöbəsinin sektor müdiri Vüqar Əliyev bildirib ki, Azərbaycanda mətbuat həmişə dövlətin diqqətində olub: “Dövlət başçısı həmişə mətbuata qayğı göstərib. Azərbaycanda mətbuatın yubileyləri dövlət səviyyəsində qeyd olunub, jurnalistlərə mükafatlar verilib. Bunlar həm maddi yardım, həm də fəxri fərmanlar şəklində olub. Ölkə başçısının sərəncamı ilə mətbuatın 135 illiyi münasibətilə jurnalistlərin evlə təmin olunmasına 5 milyon manat vəsait ayrılıb. Bundan başqa, 92 mətbuat təmsilçisi mükafat və fəxri adlara layiq görülüb”.

V. Əliyev dövlət tərəfindən 4500-ə yaxın media orqanının qeydiyyata alındığını, ölkə ərazisində yayımlanan 10-a yaxın telekanalın fəaliyyət göstərdiyini deyib.

Azərbaycanda əhalinin orta aylıq pensiyasının 190, orta aylıq əməkhaqqının isə 450 ABŞ dolları təşkil etdiyini deyən sektor müdiri hazırda jurnalistlərin əmək haqlarının da əvvəlki illərlə müqayisədə yaxşılaşdığını bildirib.

V. Əliyev onu da deyib ki, jurnalistlərin mövcud problemləri dövlətin üzərinə qoyulmamalı, jurnalist həmkarlar təşkilatları problemlərin həllində fəal olmalıdırlar.

Mətbuat Şurasının sədri Əflatun Amaşov jurnalistlərin 20-25 faizinin və 38 redaksiyanın həmkarlar hərəkatının üzvü olduqlarını söyləyib: “Azərbaycan jurnalistləri həmkarlar hərəkatının hüquqlarından bəhrələnirmi? Ayrı-ayrı redaksiyalarda buna zərurət yoxdurmu? 2012-ci ildə biz bu fəaliyyətlə aktiv məşğul olmağa başlayacağıq. Zaman keçdikcə jurnalistika sənayeləşir. Bu təşkilat güclü və davamlı olmalıdır”.

KİVDF-nin icraçı direktoru Vüqar Səfərli jurnalistlərin sosial problemlərinin həlli istiqamətində KİVDF-nin strategiyası mövzusunda çıxış edərək deyib ki, həmkərlar təşkilatı yaradılmalı, rəhbərliklə işçilər arasında müqavilə bağlanmalı, jurnalistlərin hüquqları qorunmalıdır.