Media

Ana səhifə

Media

“Yeni mediada söz azadlığı” mövzusunda panel olub və “Media açarı -2011” mükafatları təqdim edilib - FOTOSESSİYA

“Yeni mediada söz azadlığı” mövzusunda panel olub və “Media açarı -2011” mükafatları təqdim edilib - <font color=red>FOTOSESSİYA</font>

10 yanvar 2012 14:58 (UTC +04:00)

APA-nın məlumatına görə, KİV nümayəndələrinin iştirakı ilə keçirilən tədbirin moderatoru, jurnalist İlhamiyyə Rzayeva olub.

Tədbirdə Rusiyanın www.arqumenti.ru portalının baş redaktoru Dmitri Fedetov, “APA Group”un baş direktoru Vüsalə Mahirqızı və “Yeni Müsavat” qəzetinin internet versiyasının rəhbəri Xalid Kazımlı çıxış edib.

D. Fedetov bildirib ki, Rusiyada mətbuatın vəziyyəti digər postsovet ölkələrindən elə də fərqlənmir: “Yazılı və internet mətbuatında azadlığa nail olmaq mümkün olsa da, televiziyada bu məsələdə çətinliklər var. Məsələn, Rusiyada televiziyalar tam dövlətin nəzarətindədir. Əlbəttə, kənardan hər şey yaxşı görünür”. D. Fedetov eyni zamanda ölkəsində “Diffamasiya haqqında” qanunun qəbul edildiyini də deyib. Rusiyalı mütəxəssis Rusiyada internetə nəzarət edən qurumun yaradılması istiqamətində müzakirələrin intensivləşdiyini də bildirib.

“APA Group”un baş direktoru Vüsalə Mahirqızı isə çıxışında bildirib ki, Azərbaycanda da söz və ifadə azadlığı sahəsində müəyyən problemlər var. O deyib ki, “Diffamasiya haqqında” qanunun qəbul edilməməsi bununla bağlı səslənən iradlardan biridir: “Lakin mən hesab etmirəm ki, bu gün ölkədə internet media və sosial şəbəkələrin fəaliyyəti ilə bağlı problem var. Bu sahədə kifayət qədər azadlıq var, hətta bu gün Azərbaycanda ən azad fəaliyyət göstərən media növünün internet media olduğunu da deyə bilərəm. Bəzən internetə nəzarət üçün şuralar və sair yaradılacağı ilə bağlı bəzi fikir və gümanlara rast gəlinir. Amma hələ ki, bununla bağlı hər hansı rəsmi açıqlama olmayıb, ümid edirəm ki, gələcəkdə də belə bir şey olmayacaq”.

V. Mahirqızı deyib ki, o hələ layihə müzakirəyə çıxarılandan “Diffamasiya haqqında qanun”un qəbulunun tərəfdarı olub: “Bu qanunun qəbulunun xüsusi dəyişiklik vəd etdiyini düşünmürəm. İstənilən qanun o vaxt effektli olur ki, onun icraçıları, nəzarətçiləri və bu qanunla işləyənlər qanunun tələblərinə əməl eləsinlər. Yalnız bu təfəkkürlə yanaşma qanunu effektli edə bilər. Amma mən hesab edirəm ki, Azərbaycan bu qanunu qəbul etməklə beynəlxalq təşkilatların daha bir iradını bitirmiş olar”.

V. Mahirqızı deyib ki, o, Kütləvi İnformasiya Vasitələrinə Dövlət Dəstəyi Fondunun fəaliyyətini alqışlayır: “Lakin mənim şəxsi fikrim belədir ki, indiki halda internet media üçün belə bir fond yaradılmasına və vəsait ayrılmasına ehtiyac yoxdu. İnternet medianın reklam almaq imkanları var. Daha çox reklam almaq üçün mühit liberallaşdırılsa, bu daha effektli olar. Belə şəraitdə hansı media qurumunun yaşamaq, inkişaf etmək perspektivinin olduğu da təbii seçmə ilə müəyyənləşər”.

V. Mahirqızı Azərbaycanda internet media sahəsindəki problemlərə də toxunub. O deyib ki, internet resursların fors-major hallarda çökməsi reallıqdır: “Məsələn, Dövlət Neft Akademiyasında baş verən məlum hadisə zamanı Azərbaycandakı internet resursların işlək mexanizmində ciddi çətinliklər yaranmışdı. Təhlükəsizlik məsələsi, texniki problemlər, qanunlara internet media ilə bağlı dəyişikliklər edilməsi ilə bağlı da çoxlu problemlər mövcuddu. Bu isə sahənin yeni formalaşmaqda olması ilə bağlıdır”.

“Yeni Müsavat” qəzetinin internet versiyasının baş redaktoru Xalid Kazımlı da internet medianın problemlərindən danışıb. O deyib ki, ölkə mediasına xas olan problemlər onların da portalında var. “ Diffamasiya haqqında” qanunun vacibliyini qeyd edən X. Kazımlı bu qanunun qəbulundan sonra xüsusi dəyişiklik gözləmir. O, eyni zamanda qanunvericiliyə yeni media ilə bağlı dəyişikliklərin olmasına da ehtiyac görmür.

Jurnalist Asəf Quliyev, yazıçı-publisist Həmid Herisçi, Milli İnternet Forumunun prezidenti Osman Gündüz, “Yeni Müsavat” qəzetinin baş redaktoru Rauf Arifoğlu, “Azadlıq” qəzetinin baş redaktor müavini Rahim Hacıyev, politoloq Zərdüşt Əlizadə və hüquqşünas Ələsgər Məmmədli mövzu ilə bağlı danışaraq, internet resursların imkanları, mətbuatın problemləri barədə fikirlərini səsləndiriblər. “Yeni Müsavat” qəzetinin baş redaktoru Rauf Arifoğlu deyib ki, medianın problemləri həm yzılı, həm də internet mediada özünü əks etdirib. O, qəzetinin məhkəmə çəkişmələrindən danışıb və reklam bazarının qıtlığından şikayətlənib.

Sonda “Media açarı -2011” mükafatı öz sahiblərinə təqdim edilib. “İlin ən yaxşı şərhçisi” Hüseynbala Səlimov, “İlin jurnalist araşdırması” Vüsalə Əlibəyli, “İlin media adamı” isə professor Rafiq Əliyev olub. “İlin reportyoru” nominasiyası isə heç kimə verilməyib. Nominasiyanın təsisçisi Arif Əliyev deyib ki, münsiflər heyəti bu məsələdə ortaq rəyə gələ bilməyib.

Qeyd edək ki, “Media açarı”nın təsisçiləri “Yeni Nəsil” Jurnalistlər Birliyi və Azərbaycan Jurnalistlər Birliyidir.

Media_açarı