Media

Ana səhifə

Media

Azərbaycan paytaxtında kəskin hava şəraiti qəzetlərin də dövriliyinə təsir göstərib - SORĞU

Azərbaycan paytaxtında kəskin hava şəraiti qəzetlərin də dövriliyinə təsir göstərib - <font color=red>SORĞU</font>

08 fevral 2012 10:55 (UTC +04:00)

Bakı. Rəşad Süleymanov – APA. Havaların sərt keçməsi ilə əlaqədar olaraq bəzi qəzetlərin nəşr olunmasında problemlər yaranıb. APA-nın məlumatına görə, havaların soyuq keçməsi ölkədə gündəlik nəşr olunan bir sıra qəzetlərin fəaliyyətinə mənfi təsir göstərib.

“525-ci qəzet”in baş redaktoru Rəşad Məcid APA-ya açıqlamasında rəhbərlik etdiyi qəzetin sabahkı nömrəsinin çıxmayacağını bildirib. Onun sözlərinə görə, redaksiya nəşriyyatdan uzaqda yerləşir, yolların buz bağladığına görə əməkdaşlar işə gələ bilməyiblər: “Buna görə qəzet sabahkı nömrəsi nəşr olunmayacaq. Sonrakı günlərdə qəzetimizin çap olunub olunmayacağı havanın necə keçməsindən asılıdır”.

“Şərq” qəzetinin baş redaktor müavini Akif Aşırlı isə rəhbərlik etdiyi qəzetin sabahkı nömrəsinin çıxıb-çıxmayacağı barədə hələlik qərar vermədiklərini bildirib: «Bizim qəzetin çıxıb-çıxmayacağı hələ bəlli deyil”.

«Yeni Müsavat» qəzetinin isə növbəti nömrəsinin üzərində hazırlıq işləri gedir. Qəzetin baş redaktor müavini Azər Ayxanın APA-ya verdiyi məlumata görə, bu gün günorta saatlarında redaksiyanın yerləşdiyi ərazinin elektrik enerjisi ilə təchizatında problemlər yaranıb. Redaksiya heyəti generatordan istifadə edərək qəzetin növbəti nömrəsini çapa hazırlayır: “Fövqəladə bir hal baş verməzsə, böyük ehtimalla “Yeni Müsavat” sabah köşklərdə olacaq”.

“Yeni Azərbaycan” qəzetinin də sabahkı nömrəsi çapa hazırlanır. Qəzetin baş redaktoru Hikmət Babaoğlunun APA-ya verdiyi məlumata görə, qəzetin kollektivi tam heyətlə çalışır: “Hər hansı bir ciddi problem olmazsa, «Yeni Azərbaycan» qəzeti sabah çıxacaq”.

“Ekspress” qəzetinin isə sabahkı nömrəsinin çıxıb-çıxmayacağı barədə qərar verilməyib. Qəzetin redaktoru Qalib İbrahimoğlunun sözlərinə görə, bununla bağlı qərar vəziyyətdən asılı olaraq gün ərzində verilə bilər.

Hava şəraiti ilə əlaqədar olaraq «Bizim yol» qəzeti də işi dayandırıb. Qəzetin baş redaktorunun müavini Elçin Rüstəmlinin APA-ya verdiyi məlumata görə, «Bizim yol» qəzetinin sabahkı nömrəsi çıxmayacaq. Növbəti günlərdə qəzetin çıxıb-çıxmayacağı isə hava şəraitindən asılıdır.

«Xalq Cəbhəsi» qəzeti isə hava şəraitinin kəskin olmasına baxmayaraq tam heyətlə çalışır. Bu barədə APA-ya məlumat verən qəzetin baş redaktoru Elçin Mirzəbəylinin sözlərinə görə, «Xalq Cəbhəsi» sabah köşklərdə olacaq və hazırda sabahkı say çapa hazırlanır.

«Azadlıq» qəzeti də havaların sərt keçməsinə baxmayaraq sabah satışda olacaq. Qəzetin baş redaktorunun müavini Rahim Hacıyevin APA-ya verdiyi məlumata görə, qəzetin sabahkı nömrəsi çapa hazırlanır: “Hava şəraitinə baxmayaraq qəzetimizin sabahkı nömrəsini çıxarmağa çalışırıq”.

“Azərbaycan” nəşriyyatının direktoru müavini Bəsti İsmayılova isə APA-ya açıqlamasında bildirib ki, şaxtalı hava şəraitinə və yolların buz bağlamasına baxmayaraq nəşriyyatın işində heç bir problem yaranmayıb: “Qəzetlər hər gün axşam bizə müraciət edirlər. Hansı qəzetin çap olunub olunmayacağı axşam məlum olacaq”.