Media

Ana səhifə

Media

“Media kuboku-2012” start götürür

05 aprel 2012 12:56 (UTC +04:00)

İştirakçı komandalar aprelin 6-dək müraciət edə bilərlər

Bakı - APA. Heydər Əliyevin anadan olmasının 89-cu ildönümünə həsr olunan KİV komandaları arasında keçiriləcək “Media kuboku-2012" turnirinə start verilir. APA-nın məlumatına görə, artıq 8-ci ildir, bu idman tədbirini həyata keçirən "Şərq" qəzetinin baş redaktoru, turnirin təşkilat komitəsinin sədri Akif Aşırlı bildirib ki, həmişə olduğu kimi, bu il də yarışın təşkilinə ciddi hazırlıq görülüb. Artıq iştirakçı komandaların sayı dəqiqləşdirilir. Yarışlara qatılmaq istəyən media komandaları aprelin 6-dək təşkilat komitəsinə müraciət etməlidir. O, yazılı mətbuata nisbətən telekanalların bu işdə fəallığını yüksək qiymətləndirib: “Bir neçə qəzet redaksiyası birləşib öz komandalarını yaradıb, istənilən uğurlu ad seçə bilərlər. Bunu ona görə deyirik ki, bəzən redaksiyalar komandanı formalaşdırmaqda çətinlik çəkir”.

A. Aşırlı bildirib ki, yarışların bu dəfə də BDU-nun idman kompleksində keçiriləcəyi gözlənilir: “Bu barədə BDU-nun rektoru, millət vəkili Abel Məhərrəmova müraciət etmişik. Mükafatlandırma sistemində də dəyişiklik var. Ötən illərdən fərqli olaraq bu dəfə ümummilli lider Heydər Əliyevin adını daşıyan turnirə "Muğanbank" tək sponsorluq edəcək. Artıq razılaşma əldə olunub və turnirin ümumi büdcəsi 7 min manatdır. I yerin qalibi 1000, II yerinki 800, III yerin qalibi isə 500 manatla mükafatlandırılacaq və hər birinə kuboklar təqdim olunacaq. 4 nominasiya müəyyənləşdirilib və hər nominasiya üzrə qaliblər 150 manat qazanmaqla yanaşı hədiyyələr də əldə edəcəklər.

Bu dəfə də turnirə siyasi, mənəvi baxımdan dəstək olanlar diqqətdən kənarda qalmayacaq və xatirə hədiyyələri təqdim olunacaq. Oyunları AFFA-nın hakimlər korpusu idarə edəcək və artıq bu barədə rəsmi məktubla AFFA rəhbərliyinə müraciət edilib. Ən yaxşı hakimin də pulla mükafatlandırılması nəzərdə tutulub”.

Turnirin yüksək səviyyədə keçirilməsi üçün lazım olan bütün tədbirlərin həyata keçiriləcəyini bildirən A.Aşırlı sonda bütün jurnalistləri bu mötəbər idman tədbirinə dəvət edib, turnirlə bağlı yeniliklərin "Şərq" qəzeti tərəfindən işıqlandırılacağını bildirib.