Media

Ana səhifə

Media

Azərbaycan Mətbuat Şurası Avropa Yayım Birliyinə və “Eurovision-2012”-də iştirak edəcək ölkələrin mətbuat orqanlarına müraciət edib - FOTO

Azərbaycan Mətbuat Şurası Avropa Yayım Birliyinə və “Eurovision-2012”-də iştirak edəcək ölkələrin mətbuat orqanlarına müraciət edib - <font color=red>FOTO</font>

12 aprel 2012 11:30 (UTC +04:00)

APA-nın məlumatına görə, Mətbuat Şurasının sədri Əflatun Amaşov deyib ki, bir sıra xarici media qurumları Azərbaycanda görülən müsbət işləri bir kənara qoyaraq, ölkədəki kiçik neqativ halları şişirtməyə çalışır. O, belə yazıların kampaniya xarakteri almasından narahatlığını bildirib.

“Azərbaycan” qəzetinin baş redaktoru Bəxtiyar Sadıqov isə dünyanın bəzi media qurumlarını musiqi yarışmasını siyasiləşdirməməyə, jurnalist obyektivliyini qorumağa çağırıb.

Sonra Ə. Amaşov beynəlxalq mediada Azərbaycanın “Eurovision-2012” müsabiqəsinə hazırlıqları ilə bağlı yayılan neqativ məlumatlarla əlaqədar hazırlanan müraciətin mətnini oxuyub. Müraciətdə Azərbaycanda kütləvi informasiya vasitələrinin müstəqillik illərində keçdiyi inkişaf yolundan bəhs olunur, senzuranın aradan qaldırıldığı, postsovet məkanında ilk dəfə Azərbaycanda medianın özünüidarəetmə qurumu olan Mətbuat Şurasının yaradıldığı, mediaya dövlət dəstəyi məqsədilə KİV-ə Dəstək Fondunun formalaşdırıldığı, media və ifadə azadlığı ilə bağlı qanunvericilik bazasının formalaşdırılması sahəsində mühüm işlər görüldüyü, KİV sahəsində qanunvericilik bazasının Avropa standartlarına uyğun formalaşdırıldığı vurğulanır. Müraciətdə Azərbaycanda medianın problemlərinin olduğu da bildirilir, mətbuatın iqtisadi asılılığın olduğu, reklam bazarının zəifliyi, peşəkarlıq problemləri və s. sadalanır.

Müraciətdə o da bildirilir ki, bəzi qurumlar “Eurovision” kimi mədəni tədbiri öz məqsədləri üçün siyasiləşdirməyə çalışır: “Bu, milyonlarla avropalıya hörmətsizlikdir. Biz Azərbaycan həqiqətlərinin obyektiv şəkildə dünya ictimaiyyətinə çatdırılmasının tərəfdarıyıq. İstərdik ki, beynəlxalq mediada Azərbaycanda demokratik medianın formalaşması üçün həyata keçirilən tədbirlər əks olunsun, beynəlxalq media təmsilçiləri Azərbaycanın 20 faiz ərazisinin işğal altında qalması, 1 milyondan artıq qaçqın və məcburi köçkününün hüquqlarının pozulmasını nəzərə alsınlar”.

Müsabiqə ərəfəsində Azərbaycana qarşı bəzi ölkələrin media qurumları tərəfindən kampaniya aparıldığını bildirən müraciət müəllifləri bunun media peşəkarlıq prinsiplərinə uyğun olmadığını, birtərəfli və qərəzli yazılar verildiyini qeyd edib, təəssüflərini vurğulayıblar. Azərbaycan jurnalistləri müraciətlərində həmkarlarını “Eurovision” ərəfəsində və müsabiqə günlərində Azərbaycana dəvət ediblər: “Hesab edirik ki, Azərbaycanı görmək və ölkəmizin reallıqları ilə əyani şəkildə tanış olmaq Sizin məlumatınızı genişləndirəcək və yanlış təsəvvürün dəyişməsinə səbəb olacaq. Azərbaycan jurnalistlərinin səsini doğmalıqla qarşılayacağınıza, hadisə və proseslərə yanaşmada obyektivliyinizi, tərəfsizliyinizi qoruyacağınıza əminik. İnanırıq ki, ölkəmizlə bağlı əsl həqiqətləri görmək və duymaq üçün ən gözəl imkanı dəyərləndirəcək, may ayında Bakıda keçiriləcək böyük musiqi bayramında bizimlə birgə olacaqsınız”.

Ə. Amaşov müraciətin Avropa Yayım Birliyinə və yarışmada iştirak edəcək ölkələrin media qurumlarına göndəriləcəyini söyləyib.

Sonra bir sıra media qurumlarının rəhbərləri mövzu ətrafında çıxışlar ediblər. “APA Group”-un baş direktoru Vüsalə Mahirqızı deyib ki, bu müraciətin “Eurovision” ərəfəsində Azərbaycana qarşı kampaniya aparan media qurumlarının mövqeyinə təsir etməyəcəyini hamı yaxşı bilir: “Bunu biz də bilirik. Çünki bu yazılar informasiya qıtlığından deyil, konkret maraqlara xidmət edilərək yazılır. Ona görə də müraciətlə yazıların dayanması və ya obyektivləşməsi mümkün deyil. Bunu biz də anlayırıq. Bizim müraciətimizin əsas mahiyyəti ondan ibarətdir ki, həmkarlarımıza nə baş verdiyini anladığımızı göstərək. Onlara anladaq ki, konkret maraqlardan çıxış edib, sonra başqalarına media peşəkarlığı dərsi keçmək etik deyil, biz bu yazıların Azərbaycan təzyiq kampaniyasının tərkib hissəsini olduğunun fərqindəyik”.

V. Mahirqızı çıxışında “Eurovision” keçirilən ölkələrdə həmin il media və insan haqlarının pozulmasına dair qeydə alınmış tarixi faktları da sadalayıb.

“Biz də Azərbaycan mediasında problemlərin olduğunu bilirik və deyirik. Həmin problemlərin mərhələli şəkildə həllinin vacibliyini də qeyd edirik. Amma onu da bilirik ki, indi Azərbaycana qarşı aparılan kampaniya çərçivəsində media azadlığı məsələsinin gündəmə gətirilməsi vəziyyətdən sui-istifadədir. Maraq Azərbaycan mediası yox, belə yazıların yazılmasını istəyən donor ölkələrin maraqlarıdır”, - deyə v. Mahirqızı qeyd edib.

Tədbirdə digər media qurumlarının rəhbərləri də çıxış edərək, qərəzli yazılara qarşı birgə mübarizənin vacibliyini vurğulayıblar.

“Eurovision”