Media

Ana səhifə

Media

Media Hüququ İnstitutu dövlət qurumlarının on-line şəffaflıq hesabatını açıqlayıb

17 may 2012 11:08 (UTC +04:00)

Bakı. Şəhriyar Əlizadə - APA. Bu gün Media Hüququ İnstitutu dövlət qurumlarının online şəffaflıq hesabatını açıqlayıb.

APA-nın məlumatına görə, tədbirdə çıxış edən institutunun direktoru Rəşid Hacılı Azərbaycandakı dövlət qurumlarının internet saytları üzrə monitorinq apardıqlarını bildirib: “Biz apardığımız monitorinqin nəticələrinə əsaslanıb, hesabatı hazırlamışıq. Hesabatda təqdim olunan nəticələr 69 dövlət qurumunun internet resursunun monitorinqinə əsaslanır”.

Media Hüququ İnstitutunun proqram koordinatoru Xalid Ağaliyev isə monitorinqin metodologiyasını hazırlayarkən İnformasiya Azadlığının İnkişafı İnstitutunun metodologiyasından yararlandıqlarını bildirib: “Monitorinqin nəticələrinə əsasən, dövlət qurumlarının internet saytlarında qurumun strukturu, vakansiyaları və digər məsələlərlə bağlı informasiyalar azlıq təşkil edir”.

Tədbirdə çıxış edən Azərbaycan Milli Televiziya və Radio Şurasının sədri Nuşirəvan Məhərrəmli isə bu cür monitorinqlərin keçirilməsinin vacib olduğunu bildirib: “Son zamanlar Azərbaycanda internet resurslarında şəffaflıqla bağlı problemi azalır”.

Daha sonra tədbirdə dövlət qurumlarının internet saytlarının monitorinqinin nəticələri açıqlanıb. Monitorinqin nəticələrinə görə, ilk beş yeri Vergilər Nazirliyi, Baş Prokurorluq, Rabitə və İnformasiya Texnologiyaları Nazirliyi, Dövlət Sosial Müdafiə Fondu və Mərkəzi Bank tutub.