Kütləvi İnformasiya Vasitələrinin İnkişafına Dövlət Dəstəyi Fondu Nəsimi Rayon İcra Hakimiyyəti ilə birgə konfrans keçirib - FOTO

Kütləvi İnformasiya  Vasitələrinin  İnkişafına  Dövlət Dəstəyi Fondu Nəsimi Rayon İcra Hakimiyyəti ilə birgə konfrans keçirib - <font color=red>FOTO</font>
# 21 iyun 2012 16:27 (UTC +04:00)
Bakı-APA. Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fond və Nəsimi Rayon İcra Hakimiyyətinin birgə təşkilatçılığı ilə “Yerli icra hakimiyyəti orqanları ilə kütləvi informasiya vasitələri arasında əməkdaşlığın inkişaf etdirilməsi” mövzusunda konfrans keçirilib. KİVDF-dən APA-ya verilən məlumata görə, mərasim öncəsi konfrans iştirakçıları Heydər Əliyevin büstünün önünə əklil qoyub və icra hakimiyyətinin yeni tikilmiş binası ilə tanış olublar. Tədbirdə Nəsimi rayon ictimaiyyətinin nümayəndələri və tanınmış kütləvi informasiya vasitələrinin rəhbərləri iştirak ediblər. Yığıncaq iştirakçılarını salamlayan Nəsimi rayon icra hakimiyyətinin başçısı Nəsib Məhəməliyev mərasim iştirakçılarına tədbirin mahiyyəti barədə məlumat verib.

KİVDF-nin icraçı direktoru Vüqar Səfərli qurumun fəaliyyətindən geniş söz açaraq deyib ki, ötən müddətdə kütləvi informasiya vasitələrinin maddi-texniki problemlərinin həllinə və inkişafına, jurnalistlərin yaradıcılığının stimullaşdırılmasına, peşəkarlıq səviyyəsinin yüksəldilməsinə xidmət edən çoxsaylı layihələr həyata keçirilib. V.Səfərli çıxışında bildirib ki, artıq iki ildir ki, qurum bu cür layihələr həyata keçirməkdədir. Azərbaycan mətbuatının qədim tarixə malik olduğunu söyləyən icraçı direktor gələn ay Milli Mətbuatımızın 137-ci il dönümünün geniş şəkildə qeyd ediləcəyini toplantı iştirakçılarının diqqətinə çatdırıb.

O, dövlət başçısının jurnalistlərin mənzil şəraitlərinin yaxşılaşdırması istiqamətində verdiyi sərəncamı xatırladan icraçı direktor bu sahədə də işlərin uğurla davam etdiyini və jurnalistlər üçün tikilməkdə olan binanın gələn il istifadəyə veriləcəyini bildirib.

Nəsimi rayon icra hakimiyyətinin başçısı Nəsib Məhəməliyev Fondun təşəbbüsü ilə keçirilən konfransın məmurlarla jurnalistlər arasında qarşılıqlı etimadın möhkəmləndirilməsi baxımından müstəsna əhəmiyyət daşıdığını qeyd edib. Onun sözlərinə görə ölkədəki dinamik sosial-iqtisadi inkişaf Nəsimi rayonundan da yan keçməyib. Nəsimi rayonunun Bakının mərkəzi rayonu olduğunu söyləyən başçı ərazisində tıxacların aradan qaldırılması, yol infrastrukturunun yaxşılaşdırılması istiqamətində də işlər görüldüyünü KİV rəhbərlərinin diqqətinə çatdırıb.

Daha sonra dialoq və diskussiya şəraitində davam edən tədbirdə qarşılıqlı maraq doğuran məsələlərə aydınlıq gətirilib. İştirakçılar etdikləri çıxışlarda icra strukturları ilə kütləvi informasiya vasitələri arasında qarşılıqlı faydalı əməkdaşlıq əlaqələrinin genişləndirilməsi baxımından tədbirlərin əhəmiyyətindən danışıblar. Konfransda, kütləvi informasiya vasitələri ilə yerli icra strukturları arasında əməkdaşlığın daha da genişləndirilməsi ilə bağlı təkliflər irəli sürülüb.

Fondun icraçı direktoru Vüqar Səfərli Fondun Nəsimi Rayon İcra Hakimiyyəti ilə birgə razılıq əsasında “Nəsimi rayonunun sosial-iqtisadi inkişafı: real vəziyyət və prespektivlər” mövzusunda fərdi jurnalist yazıları müsabiqəsi keçirəcəyini bəyan etdi. Eyni zamanda, belə bir konfransın keçirilməsinə verdiyi dəstəyə görə Nəsimi Rayon İcra hakimiyyətinin rəhbərliyinə və rayon ictimaiyyətinin nümayəndələrinə minnətdarlığını bildirib.

Sonda Nəsimi Rayon İcra Hakimiyyətinin başçısı Nəsib Məhəməliyev tədbirin jurnalistlərlə icra strukturları nümayəndələri arasında əməkdaşlığın inkişafı baxımından əhəmiyyətini bir daha önə çəkərək faydalı təşəbbüsə görə Fondun icraçı direktoruna və aparıcı kütləvi informasiya vasitələrinin rəhbərlərinə öz təşəkkürünü bildirib.
#
#

ƏMƏLİYYAT İCRA OLUNUR