Media

Ana səhifə

Media

Mətbuat Şurasında “Ruhum Qarabağlıdır” filminin təqdimatı keçirilib

19 iyul 2012 15:38 (UTC +04:00)

Bakı-APA. Bu gün Azərbaycan Mətbuat Şurasında “Ruhum Qarabağlıdır” filminin təqdimatı keçirilib. APA-nın məlumatına görə, tədbirdə MŞ İdarə Heyətinin üzvləri, Qarabağ icmasının təmsilçiləri, tanınmış ziyalılar, ictimaiyyət nümayəndələri və jurnalistlər iştirak ediblər.

Mərasimi Mətbuat Şurasının sədri Əflatun Amaşov açaraq bildirib ki, filmin ssenari müəllifi tanınmış jurnalist-publisist Bəxtiyar Qaracadır. Filmin ideya motivinin əsasını Milli Məclisin deputatı Qənirə Paşayevanın “Ruhum Qarabağlıdır” silsiləsindən şeirləri təşkil edir. Ə.Amaşov Şuşanın işğalının 20 illiyinə həsr olunmuş filmin Ağdamın ermənilər tərəfindən zəbti günü ərəfəsində təqdimatına məntiqi aydınlıq gətirib. Məsələnin qayəsində dayanan əsas ictimai-siyasi cəhətlərin təhlilini verərək bütövləşməyə xidmətin hər bir Azərbaycan vətəndaşının başlıca qayəsi olduğuna diqqəti yönəldib.

Xocavənd Rayon İcra Hakimiyyətinin şöbə müdiri Şaiq Aslanova filmdə rayon sakinlərinin çəkildiyini deyib: “Orada peşəkar aktyorların, sənətkarların xidmətindən istifadə olunmayıb. Filmin orijinallığı nəzərə çarpan simaların müharibənin, qaçqın-köçkün həyatının ağrı-acılarını yaşayan xocavəndlilərin olmasındadır”.

Filmin nümayişindən sonra söz Milli Məclisin deputatı Qənirə Paşayevaya verilib. O, “Ruhun Qarabağlıdır” şeirlər silsiləsinin yaranma tarixindən danışıb. Millət vəkili həmin şeirlərin Qarabağ icmasında görüş zamanı 26 şəhid vermiş ana ilə söhbətin təsiri altında yarandığını, sosial şəbəkədə yerləşdirilmiş nümunənin Xocavənd rayon İcra Hakimiyyəti rəhbərliyinin ideyası əsasında lentə alındığını deyib.

Heydər Əliyev Forumunun Azərbaycan təmsilçisi Mirkazım Seyidov deyib ki, azərbaycanlıların böyük bir qismi onun hüdudlarından kənarda yaşayır: “Elə etməliyik ki, faciələrimizdən dünyanın hər yerində təfərrüatları ilə xəbərdar olsunlar. Əgər film rus dilinə də çevrilərsə, fondumuz onu qonşu dövlətin əksər regionlarında təqdimatını keçirə bilər”.

Sonda filmin ssenari müəllifi Bəxtiyar Qaraca səmimi ürək sözlərinə və diqqətə görə tədbir təşkilatçılarına və bütün iştirakçılara təşəkkürlərini bildirib.