Media

Ana səhifə

Media

Bakıda AİPS İcraiyyə Komitəsinin iclası və gənc idman jurnalistlərinin treninqləri keçiriləcək

19 sentyabr 2012 21:29 (UTC +04:00)

Bakı-APA. Sentyabrın 21-dən 24-dək Bakının Hilton otelində Beynəlxalq İdman Jurnalistləri Assosiasiyası (AİPS) İcraiyyə Komitəsinin iclası keçiriləcək.
Gənclər və İdman nazirliyinin mətbuat xidmətindən APA-ya verilən xəbərə görə, bununla əlaqədar olaraq AİPS prezidenti Canni Merlo başda olmaqla, təşkilatın rəhbərliyi və eləcə də bütün qitələr üzrə müvafiq qurumların prezidentləri Azərbaycana gəliblər.
Tədbir çərçivəsində, qonaqlar Bakıda sentyabrın 22-də futbol üzrə 17 yaşadək qızlar arasında keçirilən dünya çempionatının təntənəli açılış mərasimində iştirak edəcəklər.
Bundan başqa, AİPS Azərbaycanın Gənclər və İdman Nazirliyi və Milli Olimpiya Komitəsinin dəstəyi ilə Bakıda gənc idman jurnalistləri üçün tədris proqramını həyata keçirəcək.
Qeyd edək ki, 23 günlük Gənc Reportyorlar Proqramına AİPS-in 5 qitədən – Afrika, Asiya, Amerika, Okeaniya və Avropadan 19-25 yaşlar arasında gənc jurnalistlərdən seçdiyi 20 nəfər cəlb olunub. Onlar Bakıda 17 yaşadək qızlar arasında futbol üzrə dünya çempionatının keçirildiyi 23 gün ərzində qarşılaşmaları birlikdə izləyəcəklər və hər biri öz ölkəsində təmsil etdiyi media qurumu üçün məqalələr hazırlayacaq. Onlar Bakıda Təşkilat Komitəsinin seçdiyi Azərbaycanlı həmkarları ilə birgə çalışacaqlar.
Bundan başqa jurnalistlər üçün Keir Radenege, Edna Zhou, Raymond Çu, Terense O’Rorke, Eunju Im (sabiq FIFA referisi), Friedrih Stikler (European Lotteriesin prezidenti), Roslin Morris – AIPS-n baş katibi, Laima Janusonyte (AIPS-in vitse-prezidenti) kimi tanınmış və təcrübəli mütəxəssislər məşğələlər aparacaqlar.