Media

Ana səhifə

Media

“Azərbaycanda Yayım Mediasının Gələcəyi” adlı Milli Konfrans keçirilib - FOTOSESSİYA

“Azərbaycanda Yayım Mediasının Gələcəyi” adlı Milli Konfrans keçirilib - <font color=red>FOTOSESSİYA</font>

20 sentyabr 2012 11:03 (UTC +04:00)

Bakı. Ramil Məmmədli – APA. “Azərbaycanda Yayım Mediasının Gələcəyi” adlı Milli Konfrans keçirilib. APA-nın məlumatına görə, konfransda yayım mediasında müxtəliflik və plüralizm məsələləri, bu sahədə mövcud olan problemlər müzakirə edilib. ATƏT-in Bakı ofisinin demokratikləşmə şöbəsinin rəhbəri Nikolas Detç deyib ki, ATƏT Azərbaycanda güclü medianın olmasında maraqlıdır, çünki azad media həqiqətin əldə edilməsi kimi ali məqsədi həyaya keçirir: “Bu gün yeni media ənənəvi medianı üstələməkdədir. Bu da qarşılıqlı təcrübələrin bölüşdürülməsi prosesinə təkan verir. Ümid edirəm ki, güclü Azərbaycan üçün güclü media yarana biləcək”.

Beynəlxalq Mediaya Dəstək Təşkilatının proqram rəhbəri Gülnarə Axundova ölkə mediasında adıçəkilən sahədə problemlərin olduğunu söyləyib. Reportyorların Azadlıq və Təhlükəsizlik İnstitutunun sədri Emin Hüseynov bildirib ki, təmsil etdiyi qurum bu sahə ilə bağlı monitorinq aparıb, müşahidə olunub ki, televiziya və radio sahəsində plüralizm problemi mövcuddur.

Milli Televiziya və Radio Şurasının texniki şöbəsinin rəhbəri İsa Məmmədov qeyd edib ki, dünya 1980-ci illərdən rəqəmli sahəyə keçib: “Rabitə və İnformasiya Texnologiyaları Nazirliyi verici şəbəkənin yeni standartlarını işləyir. Hazırda rəqəmli sistem ölkənin 45%-ni əhatə edir. Bu məsələ texniki tərəflə yanaşı, həm də relyeflə bağlıdır. Ölkədə imkansız ailələrə pulsuz dekoderlərin paylanması üçün Əmək və Əhalinin Sosial Müdafiə Nazirliyi ilə müzakirə aparılır. Yəqin ki, imkansız ailələrə bu dekoderlər pulsuz paylanacaq. Bu sahədə birinci mərhələ başa çatıb, ikinci mərhələ 2013-cü ildə başa çatacaq və gələn ildə bu iş tamamilə yekunlaşacaq”.

Rabitə və İnformasiya Texnologiyaları Nazirliyinin nümayəndəsi Qulam Abdullayev təmsil etdiyi qurumun mövzu ilə bağlı həyata keçirdiyi tədbirlərdən danışıb. O qeyd edib ki, Azərbaycana məxsus peyk orbitə buraxıldıqdan sonra bir sıra problemlər öz həllini tapacaq.

“Yurd” online televiziyasının rəhbəri Rüstəm Əliyev bildirib ki, televiziya sahəsində dünyada artıq ultra HD tətbiq edilməyə başlanıb. Azərbaycanda isə HD-nin keyfiyyətli ötürülməsi üçün mütləq DVBT2 standartı tətbiq edilməlidir: “Biz istehsalçı kimi istəyirik ki, verilişlərimizi tamaşaçıya daha keyfiyyətli görüntü ilə ötürə bilək”.

İREX nümayəndəsi, media eksperti Ələsgər Məmmədli, İREX-in Azərbaycan üzrə “Yeni Media” layihəsinin rəhbəri Anjela Nikoara, “Obyektiv” online televiziyasının rəhbəri Günay İsmayılova, “Gənclərin Səsi” radiosunun rəhbəri Azər Nəzərov, jurnalist Qulu Məhərrəmli və digər natiqlər “Azərbaycanda internet teleradio yayımı son 3 ildə: nailiyyətlər və problemlərin müzakirəsi”, “İnternet teleradio yayımının inkişafında vətəndaş jurnalistikasının rolu”, “İnternet teleradio yayımının texniki və qeyri-texniki problemləri”, “İnternet teleradio yayımının perspektivləri: qeyri-kommersiya və az büdcəli layihələrdən böyük internet teleradio biznesinə doğru” mövzularında çıxışlar ediblər.