Media

Ana səhifə

Media

“Azərbaycanda media mühiti: mövcud durum və yeni çağırışlar” adlı konfrans keçirilir - FOTOSESSİYA

“Azərbaycanda media mühiti: mövcud durum və yeni çağırışlar” adlı konfrans keçirilir - <font color=red>FOTOSESSİYA</font>

25 sentyabr 2012 08:28 (UTC +04:00)

Bakı. Rəşad Süleymanov – APA. Bakıda “Azərbaycanda media mühiti: mövcud durum və yeni çağırışlar” adlı iki günlük konfrans keçirilir. APA-nın məlumatına görə, konfransda çıxış edən Avropa Birliyinin Azərbaycandakı səfiri Roland Kobia bildirib ki, AB medianın məhdudlaşdırılması ilə bağlı bir vaxtlar üzv ölkələrdə buraxılmış səhvlərin tərəfdaş ölkələrdə təkrarlanmasını istəmir: “Avropa Birliyində media və fikir azadlığı əsas fundamental dəyərlərdəndir. Vaxtilə quruma üzv ölkələrin bu sahədə bəzi səhvləri olub. Bu gün AB medianın hüquqlarının qorunması sahəsində addımlar atır. Biz mediaya bütün təzyiqləri pisləyirik. Azərbaycan 20 il ərzində böyük yol qət edib, uğurlar qazanıb”.

Bununla yanaşı, səfir qeyd edib ki, bu gün Azərbaycan telekanallarında hökumətin gördüyü işlər təqdir olunur, təriflənir, amma müxalif fikirlər televiziyada görünmür. R. Kobia online TV sahəsində Azərbaycanda kifayət qədər dəyişikliklər baş verdiyini bildirib: “Bu kanallar daha çox insana öz fikirlərini azad şəkildə bəyan etməyə imkan verir. Biz bütün növ media məhdudiyyətlərini qəbul etmirik. Bu, bütün sənədlərimizdə öz əksini tapıb”.

Azərbaycan Prezident Administrasiyasının sektor müdiri Vüqar Əliyev çıxışında Azərbaycanda medianın inkişafı sahəsində atılan addımlardan danışıb. V. Əliyev deyib ki, bu gün sosial media ənənəvi media ilə ciddi rəqabət aparır. Bununla yanaşı, hər bir cəmiyyət üçün mövcud problemlərin Azərbaycanda da müşahidə olunduğunu söyləyən V. Əliyevin sözlərinə görə, Azərbaycanda medianın mövcud durumu və perspektivləri barədə önəmli müzakirələr aparılır və bu, davam etdiriləcək.

Beynəlxalq Jurnalistlər Federasiyası baş katibinin müavini Oliver Money-Kyrle bəyan edib ki, medianın inkişafı demokratikləşmədə çox vacib amillərdən biridir.

Tədbirdə Mətbuat Şurasının sədri Əflatun Amaşov, KİV-ə Dövlət Dəstəyi Fondunun icraçı direktoru Vüqar Səfərli və digər şəxslər də çıxış ediblər.

Konfransda Azərbaycanda media azadlığı və təhlükəsizliyi, mövcud durum və yeni çağırışlar, ictimai yayım sahəsində yeni çağırışlar, demokratik medianın inkişaf etdirilməsində jurnalist ittifaqlarının rolu və s. mövzular müzakirə olunacaq. Panellərdə yerli və xarici media ekspertlərinin müxtəlif mövzular üzrə çıxışları planlaşdırılır.