Media

Ana səhifə

Media

Azərbaycan telekanallarında aparılan monitorinqlərin nəticələri açıqlanıb

18 oktyabr 2012 13:56 (UTC +04:00)

Bakı. Kəmalə Quliyeva - APA. Azərbaycan telekanallarında ədəbi dillə bağlı avqust-sentyabr aylarında aparılan monitorinqlərin nəticələri açıqlanıb.

APA-nın xəbərinə görə, monitorinq KİV-in İnkişafına Dövlət Fondunun maliyyə dəstəyi, “Elektron Mediaya Yardım Fondu”nun “Azərbaycanın teleradio məkanında ədəbi dilin qorunması layihəsi əsasında Milli Televiziya və Radio Şurası və AMEA-nın Dilçilik İnstitutunun mütəxəssisləri tərəfindən aparılıb.

Əsasən ANS, ATV, “Lider”, “Space”, “Xəzər” telekanallarında aparılan monitorinq zamanı informasiya, musiqili əyləncəli verilişlər, şou, tok-şou, dublyajlar izlənilib və səhvlər qeydə alınıb. Daha çox səhv “Xəzər” televiziyasının xəbərlər informasiya proqramının yayımı zamanı qeydə alınıb. Bu proqramda kifayət qədər orfoqrafik səhvlər aşkarlanıb, onların bəziləri texniki səhvlərdir. Lakin bəzi səhvlər televiziyada Azərbaycan dilinin orfoqrafik qaydalarına riayət edilməməsi barədə təəssürat yaradır. Ən çox durğu işarələrinin düzgün qoyulmaması, sözlərin düzgün yazılmaması hallarına rast gəlinir.

“Lider” televiziyasının xəbərlər verilişlərinin dili isə qənaətbəxş hesab edilə bilər. Lakin şou verilişlərinin və əyləncə proqramlarının dili ürəkaçan deyil. Aparıcılar russayağı tələffüz və çoxlu miqdarda xarici, xüsusilə rus sözlərindən istifadə edirlər.

“Space” televiziyasının aparıcıları dilin normalarına kifayət qədər riayət etsələr də bəzi istisnalar var. Bu istisnalar fonetik, leksik normaların pozulması ilə özünü göstərir.

ANS televiziyası fərqli danışıq tərzi ilə seçilir. Bu kanalda daha çox pozuntu halları rus ləhcəsi, digər bölgələrin ləhcələrində istifadə halları ilə bağlıdır. ANS TV-nin müxtəlif verilişlərində xarici və loru sözlərin işlədilməsi hallarına da rast gəlinir.

ATV-nin informasiya verilişlərinin aparıcılarının dili qənaətbəxşdir. Sözlər düzgün tələffüz olunur, xarici sözlər işlədilmir. Lakin əyləncə verilişlərinin aparıcıları çoxlu türk və rus ləhcələri işlətmələri ilə seçilirlər.