Media

Ana səhifə

Media

Rauf Arifoğlu: “Naxçıvan Mətbuat Şurasının bəyanatında Həkimeldostu Mehdiyevlə bağlı qeyd olunanların heç bir əsası yoxdur”

11 oktyabr 2007 16:26 (UTC +04:00)

Bu fikirləri APA-ya açıqlamasında “Yeni Müsavat” qəzetinin baş redaktoru Rauf Arifoğlu bildirib. Baş redaktor deyib ki, Naxçıvan MR MŞ adından “Yeni Müsavat” qəzetinin əməkdaşı Həkimeldostu Mehdiyevin guya cinayət əməlində təqsirli bilinərək həbs edilməsi və maddələrinin sadalanması barədə yayılan bəyanat onda heç bir təəssürat yaratmır: “Çünki onun maddələrindən daha zəngin maddələr mənim öz üzərimdə var. Hazırda Azərbaycan jurnalistikasında tək-tük redaktor var ki, bu və buna oxşar maddələri üzərində daşımasın. Mən qanunsuz silah gəzdirməkdən tutmuş, dövlət çevrilişinə, təyyarə qaçırmağa cəhd, polisə müqavimət, hakimiyyəti ələ almağa çağırış və bu kimi 10 yaxın maddə ilə istintaq altında 17 ay həbsxanada yatmışam. Bütün bunlar şəxsin cinayətkar olmasının göstəricisidirsə, onda Azərbaycan jurnalistikasının yarıdan çoxu gərək cinayətkar hesab oluna. O baxımdan bəyanatda Həkimeldostu Mehdiyevlə bağlı qeyd olunanların heç bir əsası yoxdur”.
H. Mehdiyevin mərhum Şahmərdan Cəfərovun qanuni hərbi hissəsinin zabiti olduğunu xatırladan R. Arifoğlu deyib ki, qəzetinin əməkdaşı Cəfərovun ölümündən sonra repressiyalara məruz qalaraq müəyyən müddət gizlənməyə məcbur olsa da, sonradan yaralı vəziyyətdə ələ keçirilərək məhkəmə önünə çıxarılıb: “O ki qaldı Naxçıvan Mətbuat Şurası adından yayılan müraciətdə “Yeni Müsavat”ın öz əməkdaşı ilə bağlı heç bir sənəd təqdim etməməsi fikrinə, hansı redaksiya öz müxbiri ilə bağlı sənəd təqdim edir ki? İş məhkəməyə çıxanda istənilən sənədi təqdim etməyə hazırıq”. Baş redaktor H. Mehdiyevin bir qədər öncə işə qəbul olunduğunu deyib. O qeyd edib ki, Azərbaycanın müxtəlif bölgələrində tanıdığı şəxsləri qəzetin informasiya bölümünə qəbul edib, regionlarla bağlı onların məlumatlarını qəzetdə çap etdirir: “Bəzi hallarda isə əməkdaşlarımızın bölgələrdə, xüsusən də Naxçıvanda repressiyalara məruz qalmaması üçün adlarını açıqlamırıq. Mehdiyevin müsahibələrindən birində adını açıqlaması bizim bu taktikamızı aşkara çıxardı. Beynəlxalq təşkilatların, ABŞ-ın Azərbaycandakı səfirliyinin müxbirimizə olan münasibətlə bağlı mövqeyi olduqca kəskindir, onlar bununla bağlı hakimiyyət qarşısında kəskin tələblər qoyublar. O baxımdan mən bu müraciəti Naxçıvan hakimiyyətinin müqaviməti kimi qəbul edirəm. Mehdiyev hətta keçmişində cani olsa belə, bir jurnalist kimi onunla bu cür rəftar etməyə heç kimin haqqı yoxdur. Biz bu məsələdə sona qədər israrlı olacağıq”. /APA/