Media

Ana səhifə

Media

Azərbaycan Mətbuat Şurası qurumun Nəzarət-Təftiş Komissiyasının sədri İbrahim Məmmədlinin vəfatı ilə bağlı nekroloq yayıb

16 oktyabr 2007 09:49 (UTC +04:00)

Azərbaycan Mətbuat Şurası qurumun Nəzarət-Təftiş Komissiyasının sədri İbrahim Məmmədlinin vəfatı ilə bağlı nekroloq yayıb. Mətbuat Şurasından APA-ya daxil olan nekroloqda deyilir: “Azərbaycan Mətbuat Şurasına ağır itki üz verib. MŞ yarandığı gündən 15 mart 2003-cü ildən bəri onun Nəzarət-Təftiş Komissiyasına rəhbərlik edən İbrahim Ramazan oğlu Məmmədli bu il oktyabrın 13-də dünyasını dəyişib. İ. Məmmədli 1957-ci ildə Zaqatalanın Tala kəndində anadan olub. El ağsaqqalı kimi tanınan Ramazan kişidən cəsarət, mərdlik, mübarizlik, xeyirxahlıq, işgüzarlıq və dönməzlik kimi nəcib keyfiyyətləri özündə əxz edib. Psixologiyasına xas cəsurluq, əməksevərlik və romantika onu daim həyatın çətin, lakin şərəfli fəaliyyət sahələrinə istiqamətləndirib. Bakı Dövlət Universitetinin tarix fakültəsinin və Kənd Təsərrüfatı Akademiyasının məzunu olan İ.Məmmədlini hərbi xidmət keçdiyi tank diviziyasında, rəhbər vəzifələrdə çalışdığı Azərbaycan LKGİ-də, Qarabağın odlu nöqtələrində və digər mühüm sahələrdə məhz belə tanıyıb, sevib, dəyərləndiriblər.
İbrahim müəllim prinsipial mövqeyi ilə media təmsilçilərinin də dərin rəğbətini qazanmışdı. Ölkə jurnalistlərinin I və III qurultaylarında ona göstərilən etimadların düzgün seçim olduğunu sübuta yetirmişdi. Həmkarımız MŞ-nin “Mətbuatla dövlət qurumları arasında mübahisələrin həlli” daimi komissiyasının koordinatoru, Şuranın monitorinq qrupunun rəhbəri kimi peşə vəzifələrini yerinə yetirən jurnalistlərimizin ekstremal şəraitlərdə, digər hallarda üzləşdikləri çətinliklər zamanı həmişə yanlarına tələsirdi. Yüzlərlə qələm sahibi bu diqqət və qayğının əyani şahididir. Bundan başqa, İ.Məmmədlinin Zərdabi Mətbuat Mərkəzinin sədri kimi medianın müxtəlif problemlərinin araşdırılması, xüsusilə Azərbaycanda ilk mənbədən məlumat alınması sahəsində reallaşdırdığı layihələr müasir jurnalistikamız üçün faydalı və davamına ehtiyac duyulan xidmət nümunələri sayıla bilər.
İ.Məmmədli optimist şəxs kimi mediamızın inkişafına, üzləşdiyi çətinliklərin tezliklə aradan qaldırılacağına dərin inam hissi ilə yaşayırdı. Yenicə 50 yaşı tamam olmuşdu, yüzü də aşıracağına söz vermişdi. Lakin həkimlərin, bütün onu istəyənlərin səylərinə baxmayaraq, illərin sınağında özünü doğrultmuş həmkarımızı, səmimi bir insanı itirdik. Onu doğulub boya-başa çatdığı Tala kəndində torpağa tapşırdıq. Rahat uyu, əziz qardaşımız! Allah rəhmət eləsin!” /APA/