Media

Ana səhifə

Media

“Sənət” qəzetinin baş redaktoru Samir Sədaqətoğlunun səhhətində problemlər yaranıb

17 oktyabr 2007 10:54 (UTC +04:00)

“Sənət” qəzetinin həbsdə olan baş redaktoru Samir Sədaqətoğlunun səhhətində problemlər yaranıb. Bu barədə APA-ya jurnalistin və onunla birgə həbs olunan yazıçı-publisist Rafiq Tağının hüquqlarını Müdafiə Komitəsinin rəhbəri Rasət Pirisoyu bildirib. Komitə sədrinin sözlərinə görə, S. Sədaqətoğlunun səhhətində problemlər yarandığını biləndən sonra onunla görüşmək istəsələr də, jurnalistin saxlandığı Xələcdəki 5 saylı həbsxananın rəhbərliyi buna imkan vermir.
R. Pirisoyu deyib ki, S. Sədaqətoğlu və R. Tağı bu günlərdə “Amnesty İnternational” insan haqları təşkilatı tərəfindən “vicdan cəfakeşi” adlandırılıb: “Beynəlxalq təşkilat Azərbaycan hakimiyyətinə müraciət edərək, hər iki şəxsi tez bir zamanda azad etməyə çağırıb”. Komitə sədri deyib ki, bu qərarla bağlı sədri olduğu qurum tərəfindən yaxın zamanlarda bir sıra addımlar atılacaq.
Qeyd edək ki, R. Tağı və S. Sədaqətoğlu Cinayət Məcəlləsinin 283-cü maddəsi (milli, irqi və dini düşmənçiliyi qızışdırmaq) ilə ittiham olunaraq, Səbayel rayon Məhkəməsinin qərarı ilə müvafiq olaraq 3 və 4 il müddətinə azadlıqdan məhrum ediliblər. Onlar “Sənət qəzeti”nin 2006-cı il 1 noyabr tarixli sayında çıxan “Avropa və biz” yazısına görə cəzalandırılıblar. Apellyasiya Məhkəməsi isə Səbayel rayon Məhkəməsinin qərarını qüvvədə saxlayıb. R. Tağı 16 saylı Cəzaçəkmə Müəssisəsində, S. Sədaqətoğlu isə Xələcdəki 5 saylı həbsxanada saxlanılır. /APA/