Media

Ana səhifə

Media

Rauf Arifoğlu: “Mustafa Hacıbəyli “Yeni Musavat” qəzetindən çıxarılması barədə vaxtından əvvəl məlumat yayıb”

22 oktyabr 2007 17:01 (UTC +04:00)

O, millət vəkili Nəsib Nəsiblinin Müsavat Məclisindən istefa verməsi barədə qərarını “xəyanətkar addım” kimi qiymətləndirərək, onun əleyhinə yazı yazmaqda israr edirdi. Mən bir neçə dəfə qəzetimizə və mənə yaxın adam haqqında bu cür ifadələr işlətməməyi xahiş etdim, amma olmadı. Bütün bunlar kollektivin iştirakı ilə baş verdi. Təəssüf edirəm ki, mən Mustafa bəyi iclasdan ayırmaq zorunda qaldım”. Bunu APA-ya açıqlamasında “Yeni Müsavat” qəzetinin baş redaktoru Rauf Arifoğlu qəzetin əməkdaşı Mustafa Hacıbəylinin bəzi mətbuat orqanlarında işdən ayrılmasının səbəbləri ilə bağlı verdiyi açıqlamalara münasibət bildirərkən deyib. Jurnalistlərlə, adətən, bu cür rəftar etmədiyini bildirən baş redaktor M. Hacıbəylinin vaxtından əvvəl bu cür addımlar atmasının yanlış olduğunu da söyləyib: “O, vəziyyətdən həqiqətəuyğun olmayan nəticələr çıxararaq, mənim əleyhimə yanlış məlumatlar yayır. O ki qaldı “Kim Müsavat Partiyasının üzvüdürsə, qəzetdə işləməyəcək” sözlərini deməyimə, qəzetin bütün kollektivi bilir ki, mən bunu zarafatla demişəm, hamılıqla da bu sözə gülmüşük. Mən özüm Müsavatın üzvüyəm, baş redaktorun birinci müavini Azər Ayxan, redaktorlar Zabil Müqabiloğlu, Zahid Səfəroğlu, qəzetin əməkdaşlarının yarıdan çoxu müsavatçıdır. Belə olan halda, onun bu fikirləri absurddur. Hesab edirəm ki, Mustafa bəy vərdiş etdiyi emosionallığını işə salıb, təəssüf ki, bu dəfə məni hədəf seçib. Mustafa Hacıbəyli indiyədək redaksiyada çox əlbəyaxa dava salıb. Hətta bir dəfə onu əlbəyaxa dalaşanda mən aralamışam. Ona dəfələrlə xəbərdarlıq etmişəm ki, bu cür münasibətlərlə qəzetdə çalışmaq olmaz. Bu dəfə isə o, yumruğunu yox, sözlərini mənə qarşı yönəldib. Buna görə çox təəssüflənirəm”.
R. Arifoğlu deyib ki, M. Hacıbəyli mətbuata onunla bağlı açıqlamalar verməklə bir yerdə çalışmalarına yer qoymur: “Mən indiyədək onunla bağlı qərar verməsəm də, onun bu kampaniyasından nəticə çıxarıb qərarımı elan etməyə məcburam”.
Qeyd edək ki, M. Hacıbəyli “Yeni Müsavat” qəzetinin baş redaktoru Rauf Arifoğlunun onun işdən uzaqlaşdırılmasına qərar verdiyini, bunun isə demokratik prinsiplərə və qanuna zidd olduğunu deyib. M. Hacıbəyli bildirib ki, Rauf Arifoğlu oktyabrın 20-də redaksiya iclasında onun siyasi əqidəsinə görə işdən azad olunduğunu söyləyib və Müsavat Partiyasına üzv olan qəzet əməkdaşlarının ya partiyanı, ya da qəzeti seçmələrinin zəruriliyini söyləyib. M. Hacıbəyli belə seçim qarşısında partiya üzvlüyün seçəcəyini deyəndən sonra Rauf Arifoğlu “Mustafa Hacıbəyli özünü yandırdı” söyləyib. Buna görə də qəzet əməkdaşı iddia edib ki, bu söhbətlərdən iki həftə sonra baş redaktor onu siyasi mübahisəyə çəkərək, işdən azad edib. O, R. Arifoğlunu yeni siyasi kurs müəyyənləşdirməkdə ittiham edib və o kursda müsavatçılara, xüsusən də özünə yer olmadığını söyləyib. /APA/