Media

Ana səhifə

Media

Bir neçə deputat Qənimət Zahidin zaminə buraxılması üçün baş prokurorla görüşəcək

12 noyabr 2007 12:56 (UTC +04:00)

APA-nın məlumatına görə, qəzetin baş direktoru Azər Əhmədov Q. Zahidin sərbəst buraxılmasına nail olmaq üçün barışdırıcı addımlara ehtiyac olduğunu deyib: “Qıcıqlandırıcı və sərt addımlara ehtiyac yoxdur. Qənimət Zahid rematizm xəstəliyindən əziyyət çəkdiyindən, onun zaminə buraxılmasına nail olmaq lazımdır”.
“Yeni Müsavat” qəzetinin baş redaktoru Rauf Arifoğlu isə jurnalistlərin hüquqlarının müdafiəsinin təşkil olunması məqsədilə Söz Azadlığını Müdafiə Komitəsinin təsis edilməsini təklif edib: “Ayrı-ayrılıqda müdafiə komitələrinin yaradılmasındansa, ümumilikdə problemlə mütəmadi məşğul olan səmərəli qurum formalaşdırılmasına ehtiyac var”. Baş redaktor insan haqları ilə bağlı dekabrın 10-a təyin olunan mitinqin vaxtının irəli çəkilməsini, beynəlxalq təşkilatların nümayəndələri ilə görüşlər keçirilməsini də təklif edib.
Helsinki Vətəndaş Assambleyasının Azərbaycan Milli Komitəsinin sədri Arzu Abdullayeva qüvvələrin koordinasiya edilməsi üçün bu məqsədlə eyni adlı qurumun yaradılması təklifi ilə çıxış edib.
Milli Məclisin deputatı Pənah Hüseyn isə Söz Azadlığını Müdafiə Komitəsinin təsis edilməsi ilə bağlı təklifi dəstəklədiyini söyləyib.
Reportyorların Azadlığı və Təhlükəsizliyi İnstitutunun direktoru Emin Hüseynov mətbuat nümayəndələri arasında fikir ayrılığı olduğunu, bunun isə 10 dekabr mitinqinin keyfiyyətinə təsir edəcəyini deyib.
Azərbaycan Xalq Cəbhəsi Partiyasının sədri Əli Kərimli isə fikir ayrılıqlarının qabardılmasının məqsədəuyğun olmadığını deyib. O, da vahid müdafiə komitəsinin yaradılmasını təklif edib.
Toplantıda Q. Zahidin zaminə buraxılması ilə bağlı bir qrup deputatın baş prokuror Zakir Qaralovla görüşü, Avropa ölkələrin səfirlərinin iştirakı ilə tədbirin keçirilməsi barədə də təkliflər səslənib. Bununla yanaşı, Söz Azadlığını Müdafiə Komitəsinin işçi qrupunun fəaliyyət göstərməsi üçün vəsait toplanmasına başlanılıb.
Q. Zahidin həbsi ilə bağlı yaradılmış İşçi qrupun toplantısı da keçirilib. /APA/