Media

Ana səhifə

Media

Akif Əli barəsində səslənən ittihama münasibət bildirib

14 noyabr 2007 15:38 (UTC +04:00)

“Bu gün “İnformasiyaya çıxış, hökumətlə KİV arasında münasibətlərə dair” mövzusunda keçirilən konfransda “Amerikanın səsi” radiosunun müxbirinin Nazirlər Kabinetinin mətbuat xidmətindən məlumat almağın mümkün olmaması iə bağlı söylədikləri həqiqətə uyğun deyil. Mən apardığım araşdırmalar göstərdi ki, hörmətli “Amerikanın səsi” radiosundan Nazirlər Kabinetinin mətbuat xidmətinə ümumiyyətlə, son illərdə heç bir sorğu daxil olmayıb. Bu məni çox təəccübləndirdiyinə görə, “Amerikanın səsi” radiosunun həm Vaşinqtondakı ofisinə, həm buradakı nümayəndəliyinə, həm də ABŞ-ın Azərbaycandakı səfirliyinə müraciət göndərərək, məsələnin araşdırılmasında kömək etmələrini xahiş etmişəm”. Bunu APA-ya göndərdiyi açıqlamasında Nazirlər Kabinetinin mətbuat xidmətinin rəhbəri Akif Əli bu gün ATƏT-in Bakı ofisinin təşkilatçılığı ilə keçirilən tədbirdə ünvanına söylənilən ittihama münasibətini bildirərkən qeyd edib. A. Əli deyib ki, müxbirinin fikirlərinin öz mövqeyi, yoxsa sifariş olmasını araşdıracaq: “Bəlkə də bu ABŞ-ın Azərbaycandakı müsbət xarakterli imicinə qarşı təxribat xarakterli çıxışdır? İstəyirəm ki, onlar bu məsələni araşdırmağa kömək etsinlər. Xüsusən Azərbaycan hökumətinin hər zaman ABŞ-la dostluq münasibətləri saxladığı, onu dəstəklədiyi halda, hökumət qurumuna məhz “Amerikanın səsi” radiosunun nümayəndəsi tərəfindən belə kobud böhtan deyilməsi bizə aydın olmadı. Onların reaksiyasından asılı olaraq, mən müəyyən tədbirlər görəcəyəm”.