Media

Ana səhifə

Media

Bir qrup Azərbaycan jurnalistinin Quzey Kıbrıs Türk Cümhuriyyətinə səfəri başlayıb

14 noyabr 2007 17:12 (UTC +04:00)

“Asiya Dialoqu” İctimai Birliyi və Qafqaz Media Mərkəzinin təşkilatçılığı ilə 15 Azərbaycan jurnalistinin “Quzey Kıbrıs lobbi fəaliyyətləri çərçivəsində” Quzey Kıbrıs Türk Cümhuriyyətinə (QKTC) səfəri başlayıb. APA-nın məlumatına görə, səfər çərçivəsində jurnalistlər ilk olaraq QKTC-nin dövlət televiziyası olan Bayraq Radio Televiziyasının (BRT) rəhbəri Ahmet Okanla görüşüblər. A. Okan görüş zamanı azərbaycanlı jurnalistlərə televiziya haqqında məlumat verib. O, xarici və özəl televiziyalarla əməkdaşlıq etməyə hazır olduğunu bildirib. BRT-nin 2 televiziya və 5 radiodan ibarət olduğunu deyən A. Okan şirkətində 635 nəfərin işədiyini bildirib. O, televiziya və radiosunda müxalifət-iqtidar nümayəndələrinə qarşı ayrı-seçkilik olmadığını, hər birinə eyni dərəcədə yer verildiyini bildirib.
Sonra jurnalistlər Yaxın Doğu Universitetində olublar. Orada jurnalistləri universitetin prorektoru Hüseyn Gökçekuşla görüşüblər. Universitetin problemləri haqda məlumat verən H. Gökçekuş rektor bu təhsil ocağında aAzərbaycanlı müəllimlərin işlədiyini vurğulayıb. Onun sözlərinə görə, 1988-ci ildə yaradılan universitetdə hazırda 13 fakültə, 17 min tələbə var. Sonra Mülki Müdafiə Təşkilatının başqanı Faruk Özdəmir jurnalistləri qəbul edib. O, xoş və pis günləri Azərbaycan xalqı ilə birlidə qeyd etdiyini deyərək, QKTC-nin dünyada ən təhlükəsiz dövlət olduğunu bildirib. Ölüm cinayətlərinin tamamilə olmadığını deyən F. Özdəmir ölüm hadisələrinin yalnız yol-nəqliyyat hadisələrində baş verdiyini bildirib. Onun sözlərinə görə, QKTC-nin insanları sakit yaşamaq istəyir.
QKTC-nin baş nazir müavini, xarici işlər naziri Turqay Avci Azərbaycan jurnalistləri üçün brifinq keçirib. O, QKTC-də böyük dəyişikliklər baş verdiyini bildirib: “Əcnəbilər burada evlər alıb, sərmayə qoyublar. Ölkəmizə İslam ölkələrindən iş adamları, İsrailin böyük sərmayəçiləri gəlib, Suriya ilə gəmi yolu açılıb”. T. Avci QKTC-nin bütün ölkələrdə təmsilçiliyinin açılmasını istədiyini vurğulayıb: “Dünyanın ən böyük ölkələri olan ABŞ, Böyük Britaniya, Belçikada təmsilçiliyimiz varsa, niyə başqa ölkələrdə olmasın? Hazırda 15 ölkədə nümayəndəliyimiz var”. Azərbaycanın xarici işlər naziri Elmar Məmmədyarovla dostluq münasibətinin olduğunu deyən T. Avci bu əlaqələrin daha da inkişaf etdirilməsini arzuladığını qeyd edib: “Ancaq qarşımızda bəzi problemlər var. Azərbaycandan QKTC-yə sərmayə qoyan şəxs yoxdur. Hazırda burda adambaşına düşən gəlir 10500 dollardır”.
Sonra jurnalistlər Demokrat Partiyasının başqanı Sərdar Denktaş və Beynəlxalq Birlik Partiyasının başqanı Tahsin Ərtoğruloğlu ilə görüşüblər. Bu gün Bakı vaxtı ilə saat 20:00-da QKTC-nin dövlət başçısı Mehmet Əli Tələt Azərbaycan jurnalistlərini qəbul edəcək. /APA/