Media

Ana səhifə

Media

VÜSALƏ MAHİRQIZI: ÜÇ YAŞIMIZA SALAM

16 noyabr 2007 07:36 (UTC +04:00)

“-Alo, Sizi APA-dan narahat edirlər.
- O nədir elə?”

Üç il əvvəl belə başlamışdıq. Hər zəngdə Azərbaycanın media məkanına daxil olan yeni agentliyin adının, abreviaturanın izahını vermək, sonra nə istədiyimizi demək lazım gəlirdi. Uzun, yorucu bir işin başına keçdiyimizi, həm də iddialı, bir az da hikkəli başladığımızı bilirdik.
Amma iddiamızın və hikkəmizin müqabilində imkanlarımız çox məhdud idi.
Cəmi 7 nəfər idik, eyni qəzetdən ayrılmış 4 jurnalist, bir də bizə yeni qoşulmuş və heç bir mətbuat təcrübəsi olmayan 3 tələbə. Bizim vur-tut 5 kompüterimiz, bir 200 dollarlıq fotoaparatımız, bir də 3 otaqlı kirayə ofisimiz vardı. Bunların hamısı bir yana, bizə çox ciddi ironiya var idi. Bilmirəm, ironiyanın ciddisi olur, ya yox. Amma səmimi sözümdü ki, bizə olan kinayəli münasibət çox ciddi idi. Hətta illərlə yaxın dostluq etdiyim adamlar da birgə işləməyə çəkinirdilər. Zarafat deyildi, azərbaycanlı kimi söyləsək, qəzet baş redaktoru vəzifəsində “vurulmuş”, bir il işsiz qalmış xanım necə maaş verəcək? Azərbaycan mediasının təfəkkürünə hakim olan bir agentlik var ikən bunlar bazara necə daxil olacaq? Nə işi var bunların bu bazarda? Bu layihədirmi, ömrü nə qədər olacaq?
Bu sualların hamısını eşidirdim. Amma eşitmirmiş kimi davranırdım. Bizim uşaqlara da belə məsləhət bilirdim: “Heç nəyə fikir verməyin. Kim nə desə, “sən haqlısan” söyləyib ötün”...
Biz özümüzü təsdiq üçün işləyirdik. İlk buraxılışımızda 9 xəbər vardı. Yadımdadır, bizi heç bir xahiş-minnət gözləmədən ən başda üç qəzet çap elədi: “Şərq”, “Bakı Xəbər” və “Ekspress”. O qəzetdəki baş redaktor həmkarlarıma olan iradlar, ironiyalar, “bir azdan peşman olacaqsınız”, “buna nə ehtiyac var?” atmacaları da yadımdadır... Hamısı, birbəbir...
Amma biz başladıq. Üç il sonra geriyə baxanda deyəsən heç də pis getmədik. Biz 7-dən 86-ya qədər böyüdük. İndi ofisimiz normal bir şirkətin ofisi, texnikamız ölkənin çox az media quruluşunda olacaq qədər mükəmməldir. Üç dildə on-line yayım həyata keçiririk, bir vaxtlar bizi çap edənlərə ironiya ilə yanaşanların hamısı abunəçimizdi... Birbəbir...
Biz Cənubi Qafqazda ilk video görüntülü xəbər yayımlayan agentlik olduq. Azərbaycanın ilk idman agentliyini yaratdıq. Ayrıca iqtisadi və foto agentliyi qurduq. Hər biri də Azərbaycan, rus və ingilis dillərində... Saytımızda kredit-kart sistemi tətbiq etdik. Regionun və dünyanın tanınan liderlərindən, beynəlxalq təşkilatların rəhbərlərindən müsahibələr aldıq, regionun bütün, dünyanın isə bəzi aparıcı KİV-ləri ilə əməkdaşlıq qurduq, Azərbaycan üçün önəm daşıyan və dünya siyasətinə təsiri olan ölkələrdə müxbir postları, məmləkəti başdan-başa əhatə edən yerli ofislər şəbəkəsi yaratdıq. Biz üç hərfi markaya, brendə çevirə bildik. Açmasını bilməyənlərin belə qəbul etdikləri APA adlı brend yarandı. Bu brend altında hər gün üç dildə 400-450 xəbər yayılır.
Biz heç kimi unutmadıq. Bizə olan tənqidlərə belə, qulağımızı bağlayıb, tənqid sahiblərinə qapılarımızı açdıq. Qələmimiz hamıdan yazdı və... Və beləcə üç ilin başına gəldik. Böyüdük, genişləndik, amma prinsiplərimiz, xəbərə tərəfsiz baxışımız heç dəyişmədi. Biz “qərəzsizik” demədik, qərəzsiz olduğumuzu göstərdik. Qarşı tərəfin zəhər kimi mövqeyini bal deyib yayımladıq. Mövqeyimizi qorumaq naminə heç vaxt şəxsi mövqe ortaya qoymadıq.
Biz bir brend üçün çalışdıq. İmzamızı unutdular, adımız yaddan çıxdı, hamımıza APA dedilər. Biz APA-nı belə yaratdıq, belə qoruduq, belə sevdik...

***
“-Alo, APA-dı?
-Bəli
-Sizi narahat edirik ki...”

***
Biz ORADAN BURAYA qədər gələ bildik!

P. S. Bu hesabat yazısı deyil, hələ çox qeyd olunacaq ad günlərindən birində APA-ya hədiyyədir.