Media

Ana səhifə

Media

7-dən 86-ya

16 noyabr 2007 08:26 (UTC +04:00)

Bu gün APA-nın yaranmasının 3 ili tamam olur. APA ilk xəbərlərini 2004-cü il noyabrın 16-da yaysa da, hazırlıqlar bundan xeyli əvvəl başlamışdı. Xəbərlər yayılmağa başlayandan xeyli əvvəl ofis icarəyə götürülmüş, avadanlıqlar alınmışdı. Kollektiv formalaşdırılırdı. Agentlikdə işləyəcək olanların demək olar ki, hamısı bir-birini əvvəlcədən tanıyırdı, aramızda da çox səmimi münasibətlər vardı. Baş direktordan katibəyədək hamı böyük həvəs və həyəcanla 16 noyabra hazırlaşırdı. Bir-birimizi əvvəlcədən tanımağımız və səmimi münasibətlər gərginliyin qarşısını xeyli alırdı. APA-nın ilk bülletenini zarafatlaşaraq, atmacalarla hazırlayırdıq. Bəlkə də elə ortamı yumşaldan o atmacalar idi. Hamımızın az-çox jurnalistlik təcrübəsi vardı, amma qəzetdən gəldiyimiz üçün agentlik xəbəri yazmaqda çətinlik çəkirdik. Həm də bu xəbərləri özümüzə məxsus formada yazmaq istəyirdik ki, mətbuata yeni bir xəbər quruluşu gətirək. Yəni, APA-nın xəbəri hər özəlliyinə, o cümlədən formasına görə seçilsin. O vaxtlar sayımız çox az idi.
APA-nın ilk xəbərlərinin yayılmasının ertəsi günü qəzetlər redaksiyaya gələndə gözlərimizə inanmadıq. Üç qəzetdə agentliyimizin xəbərləri yayılmışdı. “Ekspress” qəzeti isə xəbərimizi manşetə çıxarmışdı. Bu, bizim xəyalımıza belə gətirə bilməyəcəyimiz bir uğur idi. Beləliklə, biz xəbər yaymağa başladıq. Hər gün səhərdən axşamadək nazirliklərə, dövlət orqanlarına, müxtəlif təşkilatlara, səfirliklərə, beynəlxalq qurumların nümayəndəliklərinə, QHT-ə, ayrı-ayrı tanınmış şəxslərə, bir sözlə xəbər ala biləcəyimiz ehtimalı olan hər kəsə zəng edərək, APA-nın yaranması barədə məlumat verir, əlaqə yaratmaq istəyirdik. Özümüzü tanıtmaq üçün ilk vaxtlar xəbərlərimizi nazirliklərin, dövlət orqanlarının, müxtəlif təşkilatlarına, səfirliklərin, beynəlxalq qurumların nümayəndəliklərinin, QHT-in, ayrı-ayrı tanınmış şəxslərin elektron ünvanına da göndərirdik. APA-nın yaranmasından xəbərsiz olanların bəziləri hətta tədbirlərdə “bu APA nə deməkdi, mənim e-mailimə hər gün xəbər göndərir” deyə narazılıq da edirdi. Ancaq aradan çox az müddət keçəndən sonra eyni adamlar “nə yaxşı ki, bu APA var, daha qəzet almağa ehtiyacımız yoxdu, bütün xəbərləri evdə oturduğumuz yerdə oxuyuruq” dedilər. Biz də eşitdiklərimizdən həvəslənərək daha da böyük istəklə çalışırdıq. Bizim xəbərlərimizi yayan qəzet və televiziyaların sayı gündən-günə artırdı. Eyni zamanda APA-nın əməkdaşlarının da sayı xeyli çoxalmışdı. Fəaliyyətə başlayandan cəmi üç ay sonra Dilarə Əliyeva küçəsində icarəyə götürülən ofis bizə dar gəldi və Şəmsi Bədəlbəyli küçəsində daha geniş bir ofisə köçdük. Aradan bir müddət keçdi, daha böyük ofisə köçmək zərurəti yarandı. Nəticədə Zərgərpalan küçəsinə daşındıq. Cəmi bir il sonra ilk gün bizə nəhəng görünən ofisə də sığmadıq və hazırda yerləşdiyimiz ofisə köçdük. Keçən bu müddətdə yalnız əməkdaşlarımızın sayı artmadı, biz hər cəhətdən böyüdük. Bülletenlərimizin, xəbərlərimizin, əməkdaşlıq etdiyimiz qurumların sayı 50-100 dəfələrlə artdı.
Beləliklə üç il keçdi. İndi APA-nın mərkəzi ofisi ilə birlikdə Azərbaycanın bütün bölgələrində, dünyanın bir çox ölkəsində büroları fəaliyyət göstərir. 7 nəfərlə fəaliyyətə başlayan APA-nın 86 əməkdaşı var. Gündə üç dildə yüzlərlə xəbər yayırıq. Biz böyüyürük...
P.S. Ad günümüzlə bağlı yazı hazırlamağa başlayanda xeyli çətinlik çəkdim. Üç il əvvəl agentliyə ilk xəbəri yazmağa başladığım kimi. Bu müddətdə APA bizə xəbər yazmağı öyrətdi, amma yazı yazmağı unutdurdu...