Media

Ana səhifə

Media

Əli Həsənov: “Azərbaycanda 3-5 jurnalistin həbsdə olması hakimiyyətin azad sözə, azad mətbuata basqısı kimi dəyərləndirilə bilməz”

19 noyabr 2007 12:11 (UTC +04:00)

A. Uayt üç jurnalistin Eynulla Fətullayev, Qənimət Zahid və Nazim Quliyevin adlarını çəkib. O qeyd edib ki, Azərbaycanda jurnalistlərin həbs edilməsi faktları göstərir ki, hakimiyyətlə KİV arasında problemlər var. A. Uayt qeyd edib ki, azad mətbuat üçün yaradılan məhdudiyyətlər aradan qaldırılsa, ölkədə jurnalistika inkişaf edəcək. Tədbirdə Azərbaycan hökumətinə müraciət edən baş katib mətbuata münasibəti dəyişməyin vaxtının çatdığını vurğulayıb. A. Uayt Azərbaycanda diffamasiya haqqında qanunun qəbul olunmasını da təklif edib.
A. Uaytın fikirlərinə münasibət bildirən Prezident Aparatı ictimai-siyasi şöbəsinin müdiri Əli Həsənov isə Azərbaycan hökumətinin sözə, jurnalistika fəaliyyətinə görə kimlərisə həbs etməkdə maraqlı olmadığını bildirib: “Azərbaycan mediasında təxminən 30 minə yaxın şəxs aktiv jurnalistika fəaliyyəti ilə məşğuldur. Sual oluna bilər ki, nəyə görə 30 minin içərisindən 9 nəfər həbs edilib? Cənab Uayt burada Nazim Quliyevin adını çəkdi. Burada iştirak edən media nümayəndələrindən hansına sual versəniz ki, Nazim Quliyev adlı jurnalist tanıyırmı, cavab birmənalı olacaq ki, yox. Jurnalisti həbs etmək istənilən halda yaxşı hal deyil, amma jurnalist öz qələmini siyasi, şəxsi məqsədlərlə istifadə edirsə, başqalarının şərəf-ləyaqətini bilərəkdən alçaldırsa, qanun nə etməlidir? Qanunda şərəf və ləyaqət təkcə jurnalistə yox, hər bir şəxsə aiddir. Əgər insanlar mətbuatda təhqir olunursa, məhkəməyə müraciət edirlər. Hansı hüquqi dövlətdə insanlar məhkəməyə müraciət etmək hüququndan məhrum edilir? Avropada jurnalistlər ona görə həbsdə deyil ki, onlar professional səviyyədə işləyirlər. Azərbaycanda 3-5 jurnalistin həbsdə olması qətiyyən hakimiyyətin azad sözə, azad mətbuata basqısı kimi dəyərləndirilə bilməz”.
Şöbə müdirinin sözlərinə görə, hakimiyyətin yaxın hədəfi diffamasiya haqqında qanun qəbul etməkdir: “Bir şərtlə ki, Azərbaycan jurnalistləri belə olan halda məhkəməyə müraciət etmək hüququndan məhrum edilmiş insanların qarşısına çıxmağın məsuliyyətini üzərlərinə götürə bilsinlər. Sizi əmin edirəm ki, insanların məhkəməyə müraciət etmək hüququndan məhrum edilməsi Azərbaycanda Elmar Hüseynovların sayının artmasına gətirib çıxara bilər. Mən bunu Azərbaycan mentalitetinə əsaslanıb deyirəm. Bütün Avropa Azərbaycan hakimiyyətini ittiham edir ki, nəyə görə Elmar Hüseynov qətlə yetirilib? Təsəvvür edin ki, Azərbaycan jurnalistlərinin bugünkü peşəkarlıq səviyyəsində nə qədər belə halların şahidi ola bilərik?” /APA/