Media

Ana səhifə

Media

Rauf Denktaş: “Azərbaycanın torpaqlarını ermənilər işğal edib, Kıbrısın ermənisi isə rumlardır”

19 noyabr 2007 12:17 (UTC +04:00)

APA-nın məlumatına görə, QKTC-nin 24-cü quruluş ildönümünə təsadüf edən səfər zamanı Azərbaycanın media təmsilçiləri bu ölkənin siyasi, iqtisadi, ictimai, geosiyasi durumu, yaşayış səviyyəsi, ehtiyacları, təhsil və mədəniyyəti ilə bağlı məlumatlar əldə ediblər, ölkənin siyasətini müəyyənləşdirən və ona təsir imkanları olan bütün çevrələrlə görüşüblər.
Jurnalistlər səfərin ilk günü QKTC-nin dövlət televiziyası olan Bayraq Radio Televiziyasının (BRT) rəhbəri Əhməd Okan, Yaxın Doğu Universitetinin prorektoru Hüseyn Gökçəkuş, QKTC-nin Mülki Müdafiə Təşkilatının yeni başqanı Faruk Bozdəmirlə görüşüblər. Səfərin ikinci günündə Azərbaycanın media təmsilçiləri QKTC baş nazirinin müavini və xarici işlər naziri Turqay Avcı, QKTC-nin parlamentdə təmsil olunan müxalifət partiyalarının liderləri Demokrat Partiyanın başqanı Sərdar Denktaş və Ulusal Birlik Partiyasının başqanı Tahsin Ərtoğruloğlu ilə də görüşüblər.
Daha sonra Azərbaycan jurnalistləri QKTC prezidenti Mehmet Əli Tələtin brifinqində olublar. Noyabrın 15-də Azərbaycan jurnalistləri QKTC-nin 24-cü quruluş ildönümünə həsr olunmuş mərasimlərə qatılıb, hərbi paradı və “Türk Ulduzları”nın akrotim şousunu izləyiblər.
Səfərin sonuncu günündə Azərbaycan media təmsilçilərini QKTC-nin qurucusu Rauf Denktaş qəbul edib. “Asiya Dialoqu” İctimai Birliyinin missiyasının həyəcanverici olduğunu deyən R. Denktaş bu kimi əlaqələrin türk dünyasının gücləndirilməsinə xidmət etdiyini bildirib. Onun sözlərinə görə, QKTC-nin Yunan Kipri ilə birləşməyə deyil, varlığını və mövcudluğunu qorumağa ehtiyacı var. Azərbaycanın Dağlıq Qarabağ probleminə toxunan R. Denktaş bunun Kıbrıs məsələsi ilə müqayisə edilməsinin düzgün olmadığını bildirib: “Azərbaycanın torpaqlarını ermənilər işğal edib, Kıbrısın ermənisi isə rumlardır”.
Səfərin son günündə jurnalistlər Doğu Akdəniz Universitetində də olub, müəllimlər və azərbaycanlı tələbələrlə görüşüblər. Səfər çərçivəsində Azərbaycanın media nümayəndələri Kıbrıs türklərinin kütləvi qətliama uğradığı Atlılar, Muratağa, Sandallar şəhidlər məzarlığında, Barbarlıq Muzeyində olublar. Bundan başqa, “Asiya Dialoqu” İctimai Birliyinin təmsilçiləri Gənc TV-də canlı yayımlanan proqrama qatılıblar, dövlətin rəsmi xəbər agentliyi olan Kıbrıs Türk Agentliyində (TAK) olublar. Agentliyin rəhbəri Əmir Ərsoy Azərbaycan mediası ilə əməkdaşlıq etmək istəklərini dilə gətirib. Səfərin yekunu olaraq ilkin mərhələdə QKTC-nin xarici işlər naziri Turqay Avcının Azərbaycanda konfrans verməsi və QKTC jurnalistlərinin Azərbaycana səfərinin təşkili qərarlaşdırılıb.
Qeyd edək ki, QKTC-yə səfərdə İctimai Televiziyanın, “Azadlıq” radiosunun, APA və “ANS-Press” agentliklərinin, “Yeni Müsavat”, “Azadlıq”, “GÜNSəhər”, “Xəzər”, “Reytinq” və “Xalq Cəbhəsi” qəzetlərinin təmsilçiləri iştirak ediblər. /APA/