Media

Ana səhifə

Media

Beynəlxalq Jurnalistlər Federasiyasının baş katibi Aydan Uayt Azərbaycandakı bəzi media təşkilatlarını onlara yanlış məlumat verməkdə ittiham edib

21 noyabr 2007 13:33 (UTC +04:00)

İFJ-nin Azərbaycan üzrə təmsilçisi olan Jurnalistlərin Həmkarlar İttifaqından (JuHİ) APA-ya bildirilib ki, Aydan Uayt Söz Azadlığını Müdafiə Fondunun təşkil etdiyi beynəlxalq konfransda məruzə edib, bundan sonra müxtəlif media qurumları ilə görüşlər keçirib. O, Azərbaycan Mətbuat Şurası, Jurnalistlərin Həmkarlar İttifaqı, Beynəlxalq Avroasiya Mətbuat Fondu, Demokratik Jurnalistlər Liqası, “Azadlıq” radiosunun Bakı bürosu, Repartyorların Azadlıq və Təhlükəsizlik İnstitutu, Eynulla Fətullayevin Hüquqlarını Müdafiə Komitəsi, eyni zamanda Prezident Aparatı, ABŞ və Böyük Britaniyanın Azərbaycandakı səfirliklərində görüşlər keçirib, Azərbaycan mediasının durumunu müzakirə edib.
İFJ baş katibini görüşlərdə müşayiət edən JuHİ sədri Müşfiq Ələsgərli bildirib ki, Aydan Uayt müzakirələrin yekunu olaraq Azərbaycan mediasının durumu barədə mövqeyini açıqlayıb. O, ölkə mətbuatının ciddi inkişaf yolu keçdiyini, mühüm nailiyyətlər qazandığını, bununla yanaşı problemlərinin də olduğunu qeyd edib. Bildirib ki, Azərbaycan mətbuatı artıq yeni mərhələdədir, amma bu mərhələdə uğur qazanmaq üçün bir sıra vacib dəyişikliklər həyata keçirilməlidir. Zəruri dəyişikliklər sırasında ilk növbədə qanunvericiliyin təkmilləşdirilməsi nəzərdə tutulur. Aydan Uayt hakimiyyət təmsilçiləri ilə görüşündə onları təcili olaraq “Diffamasiya haqqında” qanununu qəbul etməyə çağırıb. Həmçinin, Cinayət Məcəlləsinin 147-148-ci maddələrini dəyişməyi zəruri fakt kimi önə çəkib, həbsdə olan jurnalistlərin qeyd-şərtsiz azadlığa buraxılmasını istəyib. O, Azərbaycan media təmsilçilərinin “Diffamasiya haqqında” qanununun qəbuluna hazır olmadığı barədə fikirlərə münasibətində İFJ media ictimaiyyətinin diffamasiya qanununun qəbul ediləcəyi mühitdə fəaliyyət göstərmələrini təmin etmək üçün yaxın vaxtlarda Azərbaycanda çoxsahəli proqramlar həyata keçirəcək. Proqram çərçivəsində aparıcı media təmsilçilərinin kurslara cəlb edilməsi, maarifləndirici seminarların təşkili, digər praktiki yardımlar nəzərdə tutulur.
Aydan Uayt jurnalist təşkilatları ilə görüşlərində də ciddi təkliflərlə çıxış edib. O, media təşkilatlarını problemlərin aradan qaldırılması üçün ilk növbədə öz aralarında, həmçinin beynəlxalq qurumlarla sıx əməkdaşlıq etməyə, siyasiləşmədən kənar durmağa, bəyanat və açıqlamalarında məsuliyyətli olmağa çağırıb. Aydan Uayt xüsusi olaraq belə bir faktı önə çəkib ki, Azərbaycan jurnalist təşkilatlarının ziddiyyətli mövqeləri beynəlxalq qurumlar üçün də problemlər yaradır. O, həbsdə olan jurnalistlərin azadlığa buraxılması yönündə çağırışlarına “İdeal” qəzetinin sahibi Nazim Quliyevin adının salınmasından yaranan narahatlığı qəbul etdiyini, amma bu yanlışlığın Azərbaycandakı bəzi media təşkilatlarının səhv siyasəti nəticəsində yarandığını qeyd edib. Jurnalist təşkilatlarına belə ziddiyyətli məqamlarda onları çaşdırmamağı, “reket jurnalistikası”nın nümayəndələri ilə həqiqi azad söz təmsilçilərini qarışdırmamağı tövsiyə edib.
Aydan Uayt bildirib ki, onlar Azərbaycanda nəzərdə tutduqları tədbirləri 2008-ci ilin ilk aylarından etibarən həyata keçirəcəklər. /APA/