Media

Media

Dövlət Azərbaycan telekanallarında nümayiş etdiriləcək əcnəbi filmlərinin dublyajına köməklik göstərəcək

13 dekabr 2007 09:08 (UTC +04:00)

Milli Televiziya və Radio Şurasının (MTRŞ) sədri Nuşirəvan Məhərrəmli APA-ya bildirib ki, Mədəniyyət və Turizm Nazirliyinin nəzdində olan dublyaj redaksiyası tam gücü ilə fəaliyyətə başlayacaq. N. Məhərrəmli deyib ki, iki gün əvvəl onun, mədəniyyət və turizm naziri Əbülfəs Qarayevin, Prezident Aparatının İctimai-siyasi şöbəsinin müdiri Əli Həsənovun, ölkədə fəaliyyət göstərən telekanalların rəhbərlərinin iştirakı ilə kanallarda nümayiş etdirilən filmlərin dublyaj olunması barədə geniş müzakirələr aparılıb: “Bunun üçün lazım olan zəruri vəsait də ayrılacaq. Kanallara bildirildi ki, yanvarın 1-dən efirdə verilən bütün filmlər Azərbaycan dilində olmalıdır”.
Türk dilində olan filmlərin dublyajı ilə bağlı məsələnin gündəmdə olmadığını bildirən N. Məhərrəmlinin sözlərinə görə, hələ ki, həmin filmlərin nümayişi barədə məhdudiyyətlər də nəzərdə tutulmur: “Kanallarda türk filmləri həddindən çox nümayiş etdirilsə, təbii ki, məhdudiyyətlər tətbiq ediləcək”.
Şura sədri kanallarda xarici dillərdə efirə verilən xəbərlər proqramları ilə bağlı müzakirələrin isə bir müddət sonra aparılacağını söyləyib: “Biz bu məsələni 2008-ci ildə müzakirə edəcəyik. Xarici dillərdə olan xəbərlər proqramları titrlərdə tərcümələrlə yayımlanacaq”. /APA/