Media

Ana səhifə

Media

Moskvada Azərbaycan dilində yayımlanan “İnterAz” televiziya kanalı fəaliyyətini bərpa edir

26 dekabr 2007 16:26 (UTC +04:00)

“Türksat”la yayımlanacaq televiziyanın Bakıda və Moskvada ofisləri yaradılıb, kollektiv toplanıb. “İnterAz”ın kollektivi, əsasən Az.TV-nin sabiq işçilərindən və “Space” televiziyasından cəlb olunan əməkdaşlardan formalaşdırılıb. “İnterAz”ın Rusiyadakı ofisinin bədii rəhbəri İdris Heydərli, Azərbaycandakı ofisinin bədii rəhbəri Rafiq Savalan, baş prodüseri isə Vüqar Heybətov təyin olunub. Televiziyadan, həmçinin bildirilib ki, “İnterAz”da siyasi mövzulardan uzaq, Azərbaycanın tarixi, mədəniyyəti və klassik musiqisi haqqında maarifləndirici verilişlərin yayımlanmasına üstünlük veriləcək. Məlumata görə, televiziyanın təsisçisi Ş. Nəzərli son texniki problemləri həll etmək üçün bu gün Moskvaya gedib. Gələcəkdə “İnterAz”ın KTV və BBC ilə müqavilə bağlayaraq onların xətti ilə də yayımlanması da nəzərdə tutulub.
Qeyd edək ki, “İnterAz” telekanalı 2002-ci ikin noyabrında fəaliyyətə başlayıb, bu ilin iyulunda isə fəaliyyətini dayandırıb. “İnterAz”ın Azərbaycan nümayəndəliyinin bədii rəhbəri olmuş kinorejissor, xalq artisti Vasif Babayev APA-ya bildirib ki, kanal maliyyə çətinliklərinə görə dayanıb. V. Babayevin sözlərinə görə, Saleh Xudiyevin təsisçisi və prezidenti olduğu “İnterAz” Moskva və Moskva ətrafında yayımlanıb, geniş tamaşaçı auditoriyasına malik olub. Hələ 1 il əvvəl televiziyanın Azərbaycanda nümayəndəliyi yaradılıb və qurum Ədliyyə Nazirliyində qeydiyyatdan keçib: “Nümayəndəliyin rəhbəri Elxan Muxtarov, mən isə bədii rəhbər olmuşam. Moskvadan bura texnika da gətirilmişdi. Biz Azərbaycanda verilişlər hazırlayıb Moskvaya göndərməli idik. Hətta Azərbaycan telekanallarından birində verilişlərimizi yayımlamaq üçün vaxt almaq da nəzərdə tutulmuşdu. Amma “İnterAz” Moskvada fəaliyyətini dayandırandan sonra işlər yarımçıq qaldı. Bir neçə gün əvvəl isə eşitmişəm ki, kanal yenidən fəaliyyətə başlayır”.
Milli Televiziya və Radio Şurasından isə APA-ya “İnterAz” adlı televiziyanın şurada qeydiyyatdan keçmədiyi, Azərbaycana məxsus tezliklərdə belə bir kanalın yayımlanmayacağı bildirilib. /APA/