Media

Media

Azərbaycan Mətbuat Şurası illik hesabat hazırlayıb

07 yanvar 2008 15:19 (UTC +04:00)

Buraya Şuranın İdarə Heyətinin, Şikayətlər üzrə və digər komissiyaların fəaliyyəti, müraciətlərə baxılmasının yekunları, həyata keçirilən müxtəlif layihələr və digər məsələlər daxildir. MŞ sədri Əflatun Amaşov APA-ya bildirib ki, hesabatda görülmüş işlərlə yanaşı, problemlərə, onların həlli yollarına, xüsusi ilə media-ictimaiyyət, media-hakimiyyət münasibətlərinin tənzimlənməsinin daha da təkmilləşdirilməsinə xüsusi yer ayrılıb: “Mətbuat Şurasının təsisçiləri, üzvləri, ölkə jurnalistləri və ictimaiyyət qarşısında verəcəyi hesabatın müzakirəsi zamanı səslənəcək təkliflər, iradlar, tövsiyələr Şuranın iş planında əksini tapacaq”. MŞ sədri onu da vurğulayıb ki, Şuranın fəaliyyətinin əsas hissəsini idarə, müəssisə və təşkilatlar, ayrı-ayrı vəzifəli şəxslər və adi vətəndaşlardan daxil olan şikayət və müraciətlərə baxılması təşkil edir: “Ötən il 351 şikayəti araşdırmışıq. Onların böyük hissəsi Katiblikdə, digərləri isə Şikayətlər üzrə Komissiyada və İdarə Heyətində həllini tapıb. Bu müddətdə 75 rəy və 36 qərar çıxarılıb”.
Hesabatın təqdimatının yanvar ayının birinci yarısında keçiriləcəyi gözlənilir. /APA/