Media

Media

"Zaman-Azərbaycan" qəzeti 20 Yanvar hadisələrinin 18-ci ildönümü münasibətilə xüsusi buraxılış hazırlayıb

19 yanvar 2008 09:42 (UTC +04:00)

Qəzetdən APA-ya verilən məlumata görə, Azərbaycanlı və türkiyəli iş adamlarının maddi dəstəyi ilə nəşr olunmuş xüsusi buraxılış ölkə ərazisində pulsuz paylanacaq. 24 səhifəlik xüsusi buraxılışın birinci səhifəsində "Zaman-Azərbaycan"ın baş redaktoru Enes Canseverin "Azadlıq yolunun 20 Yanvar zirvəsi" məqaləsi yer alıb. Xüsusi buraxılışın sonuncu səhifəsində Şəhidlər xiyabanın bugünkü görüntüsü və ölkə başçısı İlham Əliyevin bu sahədə gördüyü işlərdən söz açılıb. Prezidentin İcra Aparatının İctimai-siyasi məsələlər şöbəsinin müdiri Əli Həsənov “20 Yanvar Azərbaycanda xalq hərəkatından milli azadlıq mübarizəsinə keçidin dönüş məqamı oldu" məqaləsində o zaman baş verən olayları ətraflı təhlil edib.
Türkiyənin ölkəmizdəki fövqəladə və səlahiyyətli səfiri Hüseyn Avnı Karslıoğlu "20 Yanvar şəhidləri bütövlükdə insanlıq üçün böyük fədakarlıq etdilər" yazısı ilə fikirlərini oxucuya çatdırmağa çalışıb. "Hiddət və etirazın ilk ifadəsi" sərlövhəli yazıda həmin dövrdə sabiq "politbüro" üzvü kimi Moskvada yaşayan Heydər Əliyevin Azərbaycanın daimi nümayəndəliyində verdiyi kəskin bəyanatı yer alıb.
Oljas Süleymenovun 20 Yanvarın 18-ci ildönümü ilə bağlı xüsusi olaraq "Zaman-Azərbaycan" üçün qələmə aldığı "20 Yanvar" yazısı xüsusi buraxılışın 12-ci səhifəsində yer alıb. Bu yazıda o, 1990-cı ilin yanvar ayının 21-də Bakıya gələndə gördüyü dəhşətli mənzərələri qələmə alıb.
Tanınmış qırğız yazıçısı Çingiz Aytmatov isə qəzetə verdiyi müsahibəsində imperiyanın 20 Yanvarda tarixin əfv edə bilməyəcəyi cinayət törətdiyini vurğulayıb.
Türkiyə Qəzetçilər və Yazarlar Vəqfinin fəxri başqanı Fətullah Gülənin 1990-cı ilin 28 yanvarında İzmirdəki Şadırvan məscidində 20 Yanvar hadisələri ilə bağlı verdiyi xütbə də xüsusi buraxılışda əksini tapıb. Həmin yazıda "Zaman" qəzetinin F. Gülənin çağırışı əsasında Azərbaycana gəldiyi vurğulanıb.
1990-cı ilin Yanvar ayının ortalarında Azərbaycana gəlmiş, burada baş verənləri Türkiyəyə və dünyaya çatdırmış İstanbulda çıxan "Zaman" qəzetinin xəbər müdiri Halit Esendirin müşahidələri və keçirdiyi görüşlər "20 Yanvara bir neçə gün qalırdı" yazısında əksini tapıb. Yeri gəlmişkən, o, Türkiyəyə apardığı foto və video lentləri TRT ilə yayınlamaqla yanaşı, ölkəmizi gözləyən real təhlükə barədə irəlicədən dünya ictimaiyyətinə məlumat verib.
Qeyd edək ki, xüsusi buraxılışda 1988-ci ildən 1990-cı ilin 20 yanvarınadək baş verən olayların xronikası, eləcə də həmin gecə yaşananlar barədə ətraflı məlumatlar da verilib. Bu yazılar arasında xalq yazıçıları Bəxtiyar Vahabzadənin, Anarın, eləcə də "Səhər" qəzetinin təsisçisi və baş redaktoru Məzahir Süleymanzadənin, dəfn komissiyasının sədr müavini Xəliyəddin Xəlillinin yazıları maraq kəsb edir. Buraxılış hazırlanarkən 20 Yanvarda şəhid olanların ailələri, həmçinin şəhidlərlə bağlı ilk kitab yazmış Rafiq Səməndər də diqqətdən kənarda qalmayıb. /APA/