Media

Media

Demokratik Jurnalistlər Liqası Azərbaycanda söz və mətbuat azadlığı ilə bağlı keçirdiyi monitorinqin nəticələrini açıqlayıb

05 fevral 2008 14:02 (UTC +04:00)

Demokratik Jurnalistlər Liqası (DJİ) “Media problemlərinin monitorinqi, jurnalistlərə hüquqi və maddi yardım” layihəsi çərçivəsində 2008-ci ilin yanvar ayı üçün söz və mətbuat azadlığı sahəsindəki vəziyyətlə bağlı keçirdiyi monitorinqin nəticələrini açıqlayıb. DJİ-dən APA-ya verilən məlumata görə, yanvarda bu sahədə 30 fakt qeydə alınıb. Bu müddətdə bir KİV əməkdaşı Cinayət Məcəlləsinin 311.1 (rüşvət alma) maddəsi ilə təqsirləndirilərək məhkəmənin hökmü ilə 6 il müddətinə azadlıqdan məhrum olunub və ona cəzasını çəkdikdən sonra isə 2 il ərzində jurnalist fəaliyyəti ilə məşğul olmaq qadağan edilib. Nərimanov Rayon Məhkəməsi Cinayət Məcəlləsinin 147 və 148-ci maddələri ilə təqsirləndirərək, əmək haqlarının 20 faizi dövlətin xeyrinə ödənilməklə bir KİV-in baş redaktorunu 2 il, əməkdaşını isə 1 il 6 ay müddətinə islah işləri ilə cəzalandırıb. Hesabatda bildirilib ki, bir televiziya kanalının iki əməkdaşı dövlət məmuru tərəfindən fiziki və mənəvi zorakılığa məruz qalıb, bir KİV əməkdaşı ayrı-ayrı naməlum şəxslər tərəfindən edilən zənglərlə hədələnib. Qeyd edək ki, layihə Açıq Cəmiyyət İnstitutu Yardım Fondunun maliyyə dəstəyi ilə həyata keçirilir. /APA/