Media

Media

Ötən il mətbuat orqanları 103 dəfə məhkəməyə cəlb olunub

08 fevral 2008 11:40 (UTC +04:00)

Bakı.Ramil Məmmədov-APA. Media Hüququ İnstitutu (MHİ) “Azərbaycanda ifadə azadlığı ilə bağlı məhkəmə təcrübəsi və Avropa standartları” mövzusunda dəyirmi masa keçirib. APA-nın məlumatına görə, institutun direktoru Rəşid Hacılı 2008-ci ilin yanvar ayı üçün diffamasiya ilə bağlı məhkəmə işləri haqqında hesabat hazırlandığını bildirib. O, mətbuata qarşı məhkəmə iddialarının artım tendensiyasının davam etdiyini deyib: “Yanvarda mətbuata qarşı qarayaxma, gözdənsalma iddiaları ilə bağlı 25-dən artıq məhkəmə iclası keçirilib, 6 məhkəmə iddiası qaldırılıb, 5 jurnalistə azadlıqdan məhrumetmə cəzası istənilib. İddialardan yalnız biri barışıqla yekunlaşıb”. R. Hacılı ötən bir ayda mətbuatdan 530 min manat ödənc tələb olunduğunu da qeyd edib: “Ötən ayın ən ağır tələbləri Müasir Müsavat Partiyasının sədri Hafiz Hacıyev tərəfindən irəli sürülüb. Partiya sədri “Yeni Müsavat” qəzetinin baş redaktor əvəzinin və əməkdaşının həbs olunması, nəşrin 20 min manat məbləğində cərimələnməsi tələbi ilə mülki və xüsusi ittiham qaydasında məhkəməyə müraciət edib”. R. Hacılı 2007-ci ildə mətbuat orqanlarının qarayaxma və gözdənsalma iddiaları ilə bağlı 103 dəfə məhkəməyə cəlb olunduğunu açıqlayıb. Bu iddiaların 81-i rəsmilər, 12-si müğənnilər, 4-ü biznesmenlər, 6-sı isə digər şəxslər tərəfindən qaldırılıb.