Media

Media

Mətbuat Şurası “Azadlıq” qəzetinin əməkdaşının fiziki təzyiqə məruz qalması ilə bağlı baş prokurora və daxili işlər nazirinə müraciət edib

25 fevral 2008 14:05 (UTC +04:00)

Bakı. Elbrus Seyfullayev - APA. Azərbaycan Mətbuat Şurası “Azadlıq” qəzetinin əməkdaşı Aqil Xəlilovun fiziki təzyiqə məruz qalması ilə bağlı baş prokuror Zakir Qaralova və daxili işlər naziri Ramil Usubova müraciət edib. Mətbuat Şurasından APA-ya verilən məlumata görə, müraciətdə A. Xəlilovun redaksiya tapşırığı əsasında fevralın 22-də Bakının Binəqədi rayonunda, 6-cı mikrorayonla 9-cu mikrorayonun kəsişməsində yerləşən zeytun bağında ağacların kəsilməsi və yandırılması ilə bağlı reportaj hazırlayarkən iki nəfər tərəfindən zorakılığa məruz qaldığı bildirilir: “Təxminən 45-55 yaşlarında iki naməlum şəxs xidməti vəzifəsini yerinə yetirən jurnalistin vəsiqəsini əlindən alıb, ona müəyyən bədən xəsarətləri yetirərək fotoaparatını mənimsəmək istəyiblər”. MŞ hadisəni jurnalistin peşə fəaliyyətinin yolverilməz üsullarla məhdudlaşdırılmasına yönələn hərəkət kimi qiymətləndirərək A. Xəlilova fiziki xəsarət yetirənlər barəsində qanuni ölçü götürüləcəyinə əminliyini ifadə edib.
“RUH” Azərbaycan Jurnalistlərini Müdafiə Komitəsi də bu gün bəyanat yayaraq, jurnalistin döyülməsini pisləyib.