Media

Media

Bakıda Azərbaycan və Türkiyə jurnalistlərinin II beynəlxalq konfransı keçiriləcək

02 aprel 2008 14:16 (UTC +04:00)

Bakı. Məhbubə Qasımbəyli-APA. Bu ilin aprel ayında Bakıda Azərbaycan və Türkiyə jurnalistlərinin II beynəlxalq konfransı keçiriləcək. Mətbuat Şurasından APA-ya verilən məlumata görə, təşkilatçısı Türkiyənin Basın Yayın İnformasiya Baş Müdirliyi, Azərbaycan Mətbuat Şurası və Türkiyənin Azərbaycandakı səfirliyidir. Konfransda hər iki ölkənin tanınmış media mütəxəssisləri, ekspertləri və aparıcı kütləvi informasiya vasitələrinin rəhbərləri iştirak edəcəklər. Türkiyə nümayəndə heyətinin tərkibində bu ölkənin basın yayın informasiya baş müdiri müdiri Saleh Melik, dövlət naziri Mehmet Aydın da var.
Qonaqlar Şəhidlər Xiyabanını, Fəxri Xiyabanı, Bakıda şəhid olmuş türk əsgərlərinin xatirəsinə ucaldılmış abidəni ziyarət edəcək, Bakı Slavyan Universitetində xəbər janrı ilə bağlı elmi-praktik seminara qatılacaq, bir sıra aparıcı KİV-lərin redaksiyalarında görüşlər keçirəcəklər. Türkiyəli qonaqların səfəri mayın 1-dək davam edəcək.
Azərbaycan Mətbuat Şurasının sədri Əflatun Amaşovun bildirdiyinə görə, bu, türkiyəli həmkarlarımızla bir araya gəlinən ikinci konfransdır. İlk belə tədbir 2006-cı ilin yazında baş tutub. O zaman hər iki ölkə mediasının ümumi və fərqli cəhətlərinə nəzər salınaraq, birgə fəaliyyətin aspektləri müəyyənləşdirilib: “Bu dəfə isə Azərbaycan və Türkiyə mediasının müasir durumuna, üzləşdikləri çətinliklərə toxunulacaq, qloballaşan dünyada türkdilli mətbuatın yeri və roluna dair geniş fikir mübadilələri aparılacaqdır. Eyni zamanda hər iki ölkə jurnalistikasının nəzəri istiqamətləri ilə bağlı məruzələr oxunacaq”.