Media

Media

“Azadlıq” radiosunun Azərbaycan xidməti mətbuatda radio ilə bağlı səslənən son fikirlərlə bağlı açıqlama yayıb

18 aprel 2008 14:54 (UTC +04:00)

APA-nın “Azadlıq” radiosuna istinadən verdiyi məlumata görə, radionun yerli xidməti açıqlamasında bəzi KİV-in Ceff Gedminin Bakıya səfəri və Azərbaycan prezidenti ilə görüşü barədə məlumatları kontekstdən çıxardıqlarını bildirib: “Dinləyicilərimizdən, müxtəlif jurnalist təşkilatlarından daxil olan suallara cavab olaraq bildiririk ki, prezident C. Gedmin aprelin 14-dən 17-nə qədər Bakıda səfərdə olarkən dövlət başçısı, yüksək səviyyəli dövlət rəsmiləri, müxalifət liderləri və qeyri-hökumət təşkilatlarının rəhbərləri ilə görüşüb. Prezident Gedmin həmçinin “Azadlıq” radiosunun Bakı bürosunun fəaliyyəti ilə tanış olub, jurnalistlərin peşəkarlığından, radionun missiyasının uğurla həyata keçirildiyindən razılığını bildirib”.
Açıqlamada daha sonra qeyd olunub ki, prezident İlham Əliyevlə görüşdən sonra prezident Gedminin yaydığı mətbuat üçün məlumatda da göstərildiyi kimi, ölkə başçısı ilə söhbətdə “Azadlıq” radiosunun prezidenti Azərbaycanda medianın vəziyyətinə görə ciddi narahatlığını ifadə edib. Prezident Əliyev isə bu narahatlığa əsas olmadığını, ölkədə yüzlərlə qəzetin çap olunduğunu, hökumətin ölkədə internetdən istifadəni, xarici yayımları dəstəklədiyini bildirib: “Prezident Gedminin digər yüksək vəzifəli rəsmilərlə görüşlərində də bu barədə fikir mübadiləsi aparılıb, radionun yayımı sahəsində əməkdaşlıqdan razılıq ifadə olunub, yerli qanunvericilik əsasında fəaliyyət göstərən radionun verilişlərinin yayılmasında hər hansı məhdudiyyətin olmadığı vurğulanıb. Azərbaycan mətbuatında ölkə prezidentinin “Azadlıq” radiosuna ehtiyac olmadığını söylədiyi haqqında verilən məlumatlar həqiqəti əks etdirmir və radionun fəaliyyətinin dayandırılması barədə səslənən ehtimalların əsası yoxdur”.
Yerli büro qeyd edib ki, 55 ildir fəaliyyət göstərən “Azadlıq” radiosu özünün azad informasiya axınını təmin etmək missiyası istiqamətindən obyektiv fəaliyyətini davam etdirir. Radio Bakıda FM 101.7, bölgələrdə isə AM 1530 və 1296 tezliklərində yayılır. Onun yayımı internet vasitəsilə də həyata keçirilir.