Media

Ana səhifə

Media

Respublika Prokurorluğu: Azərbaycanı tərk etmək istəyən “Azadlıq” qəzetinin müxbiri Aqil Xəlil aeroportdan geri qaytarılıb

12 may 2008 15:04 (UTC +04:00)

- Son günlər bəzi Kütləvi İnformasiya Vasitələrinə müsahibə verən “Azadlıq” qəzetinin müxbiri Aqil Xəlil naməlum şəxslər tərəfindən izləndiyini bildirməklə, belə bir versiya irəli sürüb ki, onu oğurlayıb narkotik vasitələrin təsiri altında ifadə almaq istəyirlər. Bu barədə nə deyə bilərsiniz?
- Bildirmək istəyirəm ki, Aqil Xəlilov ilk gündən düzgün olmayan ifadələr verməklə istintaqı yanlış istiqamətə yönəltməyə cəhd etsə də, onun bu cəhdləri uğursuz olub. Onunla bağlı törədilmiş hadisənin peşə fəaliyyəti ilə əlaqədar olması barədə iflasa uğramış illuziyaların açıq məhkəmə baxışı zamanı bir daha ictimaiyyətə bəlli olacağı perspektivlərini görən Aqil Xəlilov heç bir əsası olmayan bəyanatlar verməklə istintaq və məhkəmədən yayınmaq yolunu seçib. Zərərçəkmiş şəxs kimi cinayət prosesini həyata keçirən orqanın çağırışı ilə gəlmək və düzgün ifadə vermək barədə cinayət prosessual qanunvericiliyinin tələblərini pozan Aqil Xəlilov istər ibtidai, istərsə də məhkəmə istintaqı zamanı iştirakı zəruri olsa da, bir neçə dəfə istintaqdan yayınmaq məqsədilə ölkəni tərk etmək istəyib. Belə ki, Aqil Xəlil ölkə hüdudlarını tərk etmək məqsədilə 10 may 2008-ci ildə Bakı-İstanbul təyyarə reysi ilə Türkiyəyə, 11 may 2008-ci ildə isə saat 09.15 radələrində Balakən rayonu, elə həmin gün saat 10.00 radələrində Zaqatala rayonu ərazisindən başqa ölkəyə getmək istəyərkən sərhəd nəzarət buraxılış məntəqəsinin əməkdaşları tərəfindən bunun qarşısı alınıb. Aqil Xəlilov heç bir əsası olmayan bəyanatlar verməklə yenə də ictimaiyyətin diqqətini istintaqın obyektiv nəticələrindən yayındırmağa çalışır. Bütün istintaq hərəkətləri Aqil Xəlilovun vəkilinin iştirakı ilə cinayət prosessual qanunvericiliyin tələblərinə müvafiq qaydada aparılır. Onun naməlum şəxslər tərəfindən izlənməsi və qanunsuz yollarla ifadə almaq barədə fikirləri əsassız olmaqla həqiqətə uyğun deyil.
- Hazırda Aqil Xəlilin ibtidai istintaqda iştirakının zəruriliyi nə ilə əlaqədardır?
- Qeyd etmək istəyirəm ki, Aqil Xəlilovun iştirakının olmaması cinayət təqibi üzrə bütün halların hərtərəfli, tam və obyektiv araşdırılmasına maneçilik törədəcəyi, istintaqın və məhkəmə baxışının yolverilməz dərəcədə uzadılması, Azərbaycan Respublikasının qoşulduğu “İnsan hüquqlarının və əsas azadlıqlarının müdafiəsi haqqında” Konvensiyanın 6-cı maddəsinin işin ağlabatan müddətdə başa çatdırılması barədə tələbinin pozulması və beləliklə, iş üzrə səmərəli ədalət mühakiməsi həyata keçirilməsini təhlükə altına qoyacağını nəzərə alaraq onun ibtidai və məhkəmə istintaqında iştirakı məqsədəmüvafiq olmaqla zəruridir. Əlavə etmək istərdim ki, prokurorluq tərəfindən Aqil Xəlilovun jurnalist olması nəzərə alınaraq üzərinə düşən vəzifələri yerinə yetirməsi, o cümlədən istintaqdan yayınmasının qarşısının alınması, istintaqa düzgün ifadə verməsi üçün müvafiq tədbirlər görülməsi məqsədilə jurnalistlərin mövcud standartlara uyğun peşə prinsiplərinə əməl etməsinə ictimai nəzarəti həyata keçirən, əsas məqsədlərindən biri mətbuatın adından sui-istifadə hallarının qarşısını almalı və bunun üçün müvafiq tədbirlər görməli olan Mətbuat Şurasına müraciət edilib.