Bakı. Könül Kamilqızı - APA. Azərbaycanda uşaq evlərindən çıxan və ali məktəblərə daxil olan uşaqların təhsil haqqının dövlət büdcəsindən ayrılmış maliyyə vəsaiti hesabına ödənilə bilər.
APA-nın xəbərinə görə, Milli Məclisin Sosial siyasət komitəsinin sədri Hadı Rəcəbli “Azərbaycan Respublikasında dövlət uşaq müəssisələrindən uşaqların ailələrə verilməsi (De-institusionalizasiya) və alternativ qayğı Dövlət Proqramı” çərçivəsində “2012-ci ilin yekunları və qarşıda duran vəzifələr” mövzusunda keçirilən hesabat konfransında deyib.
O bildirib ki, hazırda bununla bağlı Milli Məclisin Sosial siyasət komitəsində hazır layihə mövcuddur. Ötən il bunun müzakirə olunduğunu deyən H.Rəcəbli qeyd edib ki, artıq Qarabağ əlilləri və şəhid ailələri üçün bu qayda tətbiq edilib: “Hazırda valideynləri olmayan, bioloji ailəsi olmayan uşaqların təhsil haqqının dövlət büdcəsindən ayrılmış maliyyə vəsaiti hesabına ödənilməsi təklif edilir. Belə uşaqların sayı elə də böyük rəqəm deyil. Ona görə də düşünürəm ki, yaxın gələcəkdə biz buna nail olacağıq”.
H.Rəcəbli vurğulayıb ki, qanunvericiliyə dəyişiklik etməklə ali və orta ixtisas müəssisəsinə daxil olan uşaqlara 23 yaşına kimi uşaq evlərində qalma hüququ verilib: “Bu bazanın təkmilləşdirilməsi istiqamətində daima iş aparılır. Bu istiqamətdə Ailə Məcəlləsinə dəyişikliklər etməyə hazırlaşırıq”.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
