Turizm

Ana səhifə

Turizm

Mədəniyyət və Turizm Nazirliyi Londonda keçirilən beynəlxalq turizm sərgisi ilə bağlı Ermənistan KİV-də yazılanlarla bağlı bəyanat yayıb

12 noyabr 2012 11:53 (UTC +04:00)

Bakı. Ülkər Rəşidqızı – APA. “Londonda keçirilən "WTM 2012" Beynəlxalq Turizm Sərgisində Mədəniyyət və Turizm Nazirliyi təmsil olunub. Sərgi günlərində Ermənistanın müxtəlif kütləvi informasiya vasitələrində Azərbaycan stendində bu ölkəyə qarşı təbliğat-təşviqat materiallarının paylanılması və Ermənistan nümayəndələri ilə Sərginin Təşkilat Komitəsi tərəfindən bu kampaniyanın qarşısının alınması barədə bir sıra yanlış məlumatlar öz əksini tapıb”. APA-nın məlumatına görə, bu barədə Mədəniyyət və Turizm Nazirliyinin yaydığı bəyanatda bildirilir. Bəyanatda qeyd olunub ki, hər bir beynəlxalq turizm sərgisində Azərbaycanın Ermənistan tərəfindən işğal olunmuş Dağlıq Qarabağ bölgəsinin ayrıca stendlə təmsil olunmasının qarşısı nazirlik tərəfindən alınır: “Bu məsələdə Ermənistan tərəfindən hər hansı bir cəhd olunduğu təqdirdə nazirliyin nümayəndələri və ya həmin ölkədə akkreditə olunmuş Azərbaycan səfirliyi sərgi təşkilatçılarına dərhal məlumat verir və onlar tərəfindən müvafiq tədbirlər görülür.

Ölkəmizin stendindəki bütün çap məhsullarında verilən məlumatlar isə dünya ictimaiyyəti tərəfindən dəstəklənən respublikamızın ərazi bütövlüyü çərçivəsində təqdim olunur və buna görə də onların paylanması heç vaxt sərgi təşkilatçıları tərəfindən sual altına qoyulmur. Bu il də hər il olduğu kimi, "WTM 2012" Beynəlxalq Turizm Sərgisində Dağlıq Qarabağ bölgəsi ayrıca stendlə təmsil olunmayıb (Ermənistan stendində Karabakh adlı şirkət iştirak edib), ölkəmizə aid stenddə Azərbaycanın digər turizm potensiallı regionları ilə yanaşı Qarabağ və Şuşa ilə bağlı bukletlər ziyarətçilərə paylanıb və sərgi təşkilatçıları tərəfindən hər hansı bir xoşagəlməz hadisə baş verməyib. Bütün bunları nəzərə alaraq, Ermənistanın kütləvi informasiya vasitələrində yayılan məlumatları tamamilə əsassız hesab edirik və bu iftiraların həmin ölkənin daxili siyasətində müəyyən dividentlərin qazanılması məqsədilə hazırlanması kimi qiymətləndiririk”.

turizm sərgisi _ bəyanat