Bakı. Ramil Məmmədli-APA. “Narahatlıq yaradan məqam kənardan gələn din və məzhəblərdir. Bu kənar qüvvələr hər an Azərbaycanda məzhəblər arasındakı anlaşmanı poza bilər. Çünki kənardan gələn istənilən ideologiya narahatlıq mənbəyidir”.
Bu açıqlamanı APA-ya Türkiyə Cəfəri İcmasının rəhbəri Səlahəddin Özgündüz deyib. S. Özgündüz bildirib ki, iki əsrə yaxındır Azərbaycan İslam aləmindən qoparılıb: “Bir əsrə yaxın müddətdə isə kommunist-ateist rejiminin təsiri altında qalıb. Buna baxmayaraq, Azərbaycanda dinə münasibət köklü olaraq dəyişilməyib. Azərbaycanın daha bir müsbət özəlliyi də odur ki, bu torpaqlarda din və məzhəb savaşları olmayıb”.
S. Özgündüz qeyd edib ki, kənardan gələn sünni də, şiə də Azərbaycan xalqına dərs vermək əvəzinə, buradan öyrənməlidir: “Onlar Azərbaycan xalqından dostluq və bərabərlik şəklində necə yaşamağı öyrənməlidir. Təəssüf ki, burada əksini həyata keçirirlər. Azərbaycana gələn bu missionerlər xalqı öyrətməyə gəlirlər. Bu missionerlər üçün Azərbaycan sanki ovlaqdır, buranın insanları ov, onlar isə ovçudur”.
Türkiyə cəfərilərinin lideri bu cür məzhəb missionerlərinə çağırış da edib: “Azərbaycana qardaş kimi gəlin. Bu insanlar o zaman qardaş olduqlarını göstərərlər ki, Qarabağ və digər problemlərinin həllində Azərbaycanın yanında olsunlar. Onların bir çoxunun hərəkəti isə qardaşlığa yaraşmır. İstəyim odur ki, Azərbaycanın din xadimləri, dindarlarının heç birinin kənarla bağlılığı olmasın. Çünki kənardan gələnlər fitnə axtarar və qarışıqlıq yaratmaq istəyər. Bu dediklərim Türkiyəyə də aiddir”.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
