“4-cü Sənaye İnqilabı dövründə Yeni Media” mövzusunda keçirilən Şuşa Qlobal Media Forumu çərçivəsində "Müasir informasiya mühitində media menecmenti və dayanıqlı media biznes modellərinin yaradılması" adlı panel müzakirəsi olub.
APA xəbər verir ki, panel müzakirəsində iştirakçılar media məhsullarının istehsalı və istehlakı ilə bağlı dəyişən trendlər, dayanıqlı media üçün investisiya mənbələri barədə fikir mübadiləsi aparıblar.
Paneldə çıxışında TRT-nin koordintoru Bora Bayraktar özəl media ilə rəqabətin çətin olduğunu deyib.
Mediada məsuliyyətin vacib olduğunu qeyd edən Bayraktar əlavə edib ki, insanlar, auditoriya mediaya etimad edir, inanır, ona görə də media məsuliyyətli olmalı, bu etimada uyğun davranmalıdır: "Region barədə reportaj hazırlayarkən həmin regionun geosiyasi reallıqlarını, baş verənləri, dəyərləri nəzərə almaq lazımdır".
TRT barədə o deyib ki, kanalın bəlli kimliyi, strategiyası var: "Biz kimliyimizi diktə etmirik. Bu kimlik Türkiyədən də böyükdür. Bizim Aralıq dənizi kimliyimiz, Qafqaz kimliyimiz, Avropa kimliyimiz var. Bu kimliyimiz dünyada baş verənləri necə işıqlandırmaqla da çarpazlaşır".
Paneldə danışan TASS-ın Baş direktorunun birinci müavini Mixail Qusman çıxışında deyib ki, Şuşada dəfələrlə olub, bura çox gözəl Azərbaycan şəhəridir: "Artıq 5-ci dəfədir bura gəlirəm, şəhərin rifahını görürəm. İndi burada çox adam yaşamır, şəhər bərpa olunur".
O vurğulayıb ki, klassik media və sosial medianı qarışdırmaq olmaz, onların auditoriyaları var. Amma peşəkarlıq, tarix baxımından klassik media əvəzolunmazdır: "Sosial medianın ənənəvi medianı, qəzetləri öldürdüyünü demək tezdir. Yaponiya və ABŞ kimi ölkələr texnoloji cəhətdən inkişaf etmiş ölkələrdir, amma qəzetlər bu cəmiyyətlərdə aparıcı rol oynayır. Jurnalistika profesionnalıq, dürüstlük, məsuliyyət tələb edir".
O, xəbər agentliklərinin fəalliyətinə də toxunub, deyib ki, agentliklərin rolu xəbərləri çatdırmaqdır, artıq analitiklər, qurumlar, digər medialar həmin informasiyanı özü interpretasiya edə bilər.
Paneldə çıxış edən Serbiya Parlamentinin keçmiş deputatı, Strateji Araşdırmalar Forumunun prezidenti Neven Cveticanin deyib ki, dəqiq, dürüst xəbərlər verən, analizlər təqdim edən media gələcəyi proqnozlaşdırmaq üçün vacibdir: "Hesab edirəm ki, elə bir media yoxdur ki, onun siyasi dairələrlə əlaqəsi, dialoqu olmasın. Sizin siyasi dairələrlə əlaqənizin olması bəzən sizin işinizə yarayır, korrupsiya və ya cinayətlərin araşdırılmasına imkan verə bilir. "Watergate" skandalını xatırlayın, jurnalist araşdırması Niksonun istefası ilə nəticələndi. Təbii ki, bu araşdırmanın reallaşmasında müəyyən dairələr də kömək etmişdi. Amma təbii ki, bəzən cəsarətli jurnalistlər də olur ki, onlar təkbaşına araşdırma aparır".
"Economyfirst Limited London" şirkətindən Klaus Yürgens deyib ki, jurnalist bəzən mövqeli olmalıdır, amma bu o demək deyil ki, siz hansısa dairənin, partiyanın sözçüsü olasınız: "Jurnalist mövqeyini müəyyənləşdirmək üçün daha çox araşdırmalıdır. Bu, nəticədə onun yazılarında da öz əksini tapacaq".
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
