Bakı-APA. Kaliforniya ştatının hüquq-mühafizə orqanları sosial şəbəkələrdə Los-Anceles şəhəri ibtidai məktəblərinin ünvanına təhdidlər səsləndirən şəxsi həbs ediblər. APA-nın “Assoşieyted Press”ə istinadən verdiyi xəbərə görə, saxlanılan şəxsdən 9 silah, o cümlədən bir neçə tüfəng müsadirə olunub.
Polisin verdiyi xəbərə görə, 24 yaşlı Kayl Banqayan dekabrın 17-də saxlanılıb. Məhkəmə onun 500 000 dollar girov müqabilində azadlığa buraxıla biləcəyi barədə qərar qəbul edib. Hal-hazırda o istintaq təcridxanasında saxlanılır.
Məlumatda bildirilir ki, yerli sakin tərəfindən hüquq-mühafizə qurumlarına bir nəfərin sosial şəbəkələrdə ibtidai məktəblərin ünvanına təhdidlər səsləndirdiyi barədə məlumat daxil olan kimi, polis və Federal Təhqiqatlar Bürosunun əməkdaşları Banqayanın atası evinə gəliblər.