Bakı. Cavid Zeynalov - APA. Sankt-Peterburq Rəssamlar İttifaqının sərgi mərkəzində “Azərbaycan xalçaları” sərgisi açılıb.
Mədəniyyət və Turizm Nazirliyindən APA-ya verilən məlumata görə, gənc xalça ustalarının əl işlərinin nümayiş olunduğu sərginin təşkilatçıları Azərbaycanın Sankt-Peterburqdakı baş konsulluğu ilə Mədəniyyət və Turizm Nazirliyinin Mədəniyyətşünaslıq üzrə Elmi-Metodik Mərkəzidir.
Açılışda Sankt-Peterburq Administrasiyasının nümayəndələri, şəhərdəki universitetlərin alimləri, diplomatik korpusun təmsilçiləri və Azərbaycan diasporunun üzvləri iştirak ediblər.
Azərbaycanın Sankt-Peterburqdakı baş konsulu Elşad Qulamov, Sankt-Peterburq Administrasiyasının nümayəndəsi Olqa Podşuveyt, mədəniyyətşünaslıq üzrə Elmi-Metodik Mərkəzinin direktoru Vilayət İsmayılov Azərbaycan mədəni irsini nümayiş etdirən sərginin əhəmiyyətindən danışıblar.
Sərgidə qonaqlara Azərbaycan Xalçası və Xalq-Tətbiqi Sənəti Dövlət Muzeyinin yeni binası ilə bağlı videoçarx göstərilib.
Nazirlikdən bildiriblər ki, təşkilatçılar adından Sankt-Peterburq Administrasiyasının Xarici əlaqələr komitəsinə əl ilə toxunmuş xalça hədiyyə edilib.
Sərgi dekabrın 15-dək davam edəcək.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
