Bakı. Mahir Məmmədli-APA. Bakıda ailə faciəsi baş verib. APA--nın məlumatına görə, ər arvadını öldürüb, sonra özü intihar edib. Hadisə paytaxtın Nəsimi rayonu ərazisində, Mir Cəlal küçəsi 35 ünvanında qeydə alınıb.
Binanın 40-cı mənzilində yaşayan ər və arvad - 48 yaşlı Qurbanov Şahin Məmmədəli oğlu və 38 yaşlı Ağayeva Gülnurə Oktay qızından bir müddət xəbər olmayıb. Gülnurə Ağayevanın İmişlidə anasıgildə olan bacısı dəfələrlə zəng etsə də, nə Gülnurə, nə də əri Şahin Qurbanov zənglərə cavab verib. Narahat olan qadın özünün iş yoldaşlarından bacısıgilin yaşadığı evə getməyi xahiş edib. Onlar mənzilə getsələr də, qapını açan olmayıb. Bundan sonra Fövqəladə Hallar Nazirliyinin (FHN) Böhran Vəziyyətlərində İdarəetmə Mərkəzinə məlumat verilib. Hadisə yerinə FHN-in Xüsusi Riskli Xilasetmə Xidmətinin xilasediciləri cəlb ediliblər. Onlar beşmərtəbəli binanın dördüncü mərtəbəsindəki mənizilin qapısını sındıraraq, içəri daxil olublar. Xilasedicilər yataq otağında 38 yaşlı Gülnurə Ağayevanın boğazı kəsilmiş meyitini aşkarlayıblar. Daha sonra hamam otağında 48 yaşlı Şahin Qurbanovun asılmış meyiti tapılıb.
Faktla bağlı hüquq-mühafizə orqanlarına məlumat verilib, hadisə yerinə kriminalistlər cəlb edilib. İlkin araşdırmalar zamanı müəyyən edilib ki, Şahin Qurbanov əvvəlcə arvadı Gülnurə Ağayevanın boğazını kəsib, daha sonra isə hamam otağında özünü asıb.
Qonşuların verdiyi məlumata görə, Şahin Qurbanov və Gülnurə Ağayeva cütlüyünün 4 yaşlı qızı var. Bu, Gülnurə Ağayevanın ikinci evliliyidir. O, ilk evliliyindən də 19 yaşlı qız anasıdır.
Hadisənin səbəbləri barədə hələlik heç bir məlumat yoxdur. Amma qonşular Şahin və Gülnurənin sakit ailə olduğunu, evlərindən heç vaxt dava-dalaş səslərinin gəlmədiyini deyirlər.
Faktla bağlı Nəsimi rayon Prokurorluğunda cinayət işi başlanılıb, istintaq gedir.
***
17:34
Bakı-APA. Bu gün Fövqəladə Hallar Nazirliyinin (FHN) Böhran Vəziyyətlərində İdarəetmə Mərkəzinə, Bakı şəhəri, Nəsimi rayonunda 1968-ci il təvəllüdlü Qurbanov Şahin Məmmədəli oğlu və 1978-ci il təvəllüdlü Ağayeva Gülnurə Oktay qızının mənzildə bağlı qapı arxasında köməksiz vəziyyətdə qalması barədə məlumat daxil olub.
APA-nın FHN-nin saytına istinadən verdiyi məlumata görə, dərhal FHN-nin Xüsusi Riskli Xilasetmə Xidmətinin xilasediciləri hadisə yerinə cəlb olunaraq mənzilə baxış keçirib və vətəndaşları huşsuz vəziyyətdə aşkar ediblər.
Hadisə yerinə çağırılmış Təcili Tibbi Yardım Stansiyasının həkimləri tərəfindən aparılmış ilkin müayinə zamanı vətəndaşların vəfat etdiyi müəyyən olunub. Əməliyyat saat 15:20-də başa çatıb.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
