Bakı. Fərid Mirzəyev - APA. Azərbaycanın “SilkWay” aviaşirkətinə məxsus “AN 12” yük təyyarəsinin Əfqanıstanda qəzaya uğraması nəticəsində ölən ukraynalı heyət üzvünün cəsədi yaxınları tərəfindən tanınıb.
Hüquq-mühafizə orqanlarından APA-ya verilən məlumata görə, bu, Zadnipryanets Ruslan Vladimiroviçdir. R. Zadnipryanetesin cəsədinin ailəsinə verilməsi ilə bağlı razılıq əldə edilib.
Qeyd edək ki, indiyə kimi heyətin 3 azərbaycanlı üzvünün – Nadir Rzayev, Firdovsi Şahverdiyev və Azər Zülfiyevin nəşləri ailələrinə təhvil verilib. Hazırda 3 nəfərin (1 özbək, 2 azərbaycanlı) meyiti Məhkəmə-Tibbi Ekspertiza və Patoloji Anatomiya Birliyindədir. Onların cəsədlərinin tanınması ilə bağlı genetik ekspertiza təyin edilib, bu istiqamətdə müvafiq iş aparılır.
Onu da qeyd edək ki, mayın 18-də “SilkWay” şirkətinə məxsus yük təyyarəsi Əfqanıstanda qəzaya uğrayıb. Təyyarənin 9 ekipaj üzvündən 7-si həlak olub. Ekipaj üzvləri bunlardır:
1. Şaydanov Rəşid Rəhmanoviç (Özbəkistan vətəndaşı), təyyarənin kapitanı, 1953-cü il təvəllüdlü
2. Abdullayev Altay Oqtay oğlu (Azərbaycan vətəndaşı), ikinci pilot, 1971-ci il təvəllüdlü
3. Əsədullayev Nazim Orucəli oğlu (Azərbaycan vətəndaşı), şturman, 1968-ci il təvəllüdlü
4. Rzayev Nadir Adıgözəl oğlu (Azərbaycan vətəndaşı), bort mühəndisi, 1964-cü il təvəllüdlü
5. Şahverdiyev Firdovsi Şir oğlu (Azərbaycan vətəndaşı), radio-operator, 1964-cü il təvəllüdlü
6. Zülfiyev Azər Ağakişi oğlu (Azərbaycan vətəndaşı), bort operatoru, 1973-cü il təvəllüdlü
7. Zadnipryanets Ruslan Vladimiroviç (Ukrayna vətəndaşı), texnik, 1969-cu il təvəllüdlü
8. Qanja Andrey Nikolaeviç (Ukrayna vətəndaşı), texnik, 1955-ci il təvəllüdlü
9. Əliyev Rəmzi Mamudoviç (Ukrayna vətəndaşı), texnik, 1963-cü il təvəllüdlü
Hadisə nəticəsində texniklər Qanja Andrey və Əliyev Rəmzi sağ qalıb. Onların vəziyyəti stabil-qənaətbəxş olaraq qiymətləndirilir.
Azərbaycan tərəfi hadisənin səbəblərini araşdırmaq üçün komissiya yaradıb.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
