Bakı. Könül Kamilqızı – APA. Tələbə Qəbulu üzrə Dövlət Komissiyası (TQDK) ali təhsil müəssisələrinə qəbul olmaq istəyən abituriyentlər üçün mayın 8-də respublikanın 37 şəhər və rayonunda sonuncu sınaq imtahanları keçirib. TQDK-nın mətbuat xidmətindən APA-ya verilən xəbərə görə, imtahanda iştirak etmək üçün yazılış internet vasitəsilə aparılıb və 50258 abituriyent qeydiyyatdan keçib. İmtahanlar Bakı, Sumqayıt, Naxçıvan, Gəncə, Şəki, Göyçay, Şirvan, Lənkəran, Ağcabədi, Xaçmaz, Daşkəsən, Ağstafa, Şamaxı, Qobustan, Mingəçevir, Goranboy, Yevlax, Zaqatala, Qəbələ, Bərdə, İsmayıllı, İmişli, Fizuli, Beyləqan, Saatlı, Yardımlı, Cəlilabad, Masallı, Siyəzən və Şabran, Babək, Kəngərli, Ordubad, Sədərək, Culfa, Şərur, Şahbuz şəhər və rayonlarında, ümumilikdə 68 binada təşkil olunub.
Sınaq imtahanları bütün mərkəzlərdə təlimata uyğun olaraq keçirilib. İmtahan prosesinin idarə olunması üçün TQDK-da operativ qərargah fəaliyyət göstərib.Mayın 9-dan etibarən komissiyada imtahan protokolları və cavab kartlarının emalına başlanılıb və nəticələr yaxın günlərdə elan olunacaq. İmtahan nəticələrini Komissiyanın internet səhifəsindən və bütün mobil operatorlardan iş nömrəsini 7727-yə boş SMS göndərməklə öyrənmək olar.
Sınaq imtahanlarına müəyyən olunmuş vaxtda qeydiyyatdan keçib iştirak edə bilməyən abituriyentlərin nəzərinə çatdırırıq ki, TQDK-nın internet saytında (https://eservices.tqdk.gov.az/sinaq/online_ex.aspx ) online qaydada sınaq imtahanı xidmətindən istifadə edə bilərlər. 03, 10, 24 aprel tarixlərində I-IV ixtisas qrupları üzrə keçirilmiş sınaq imtahanlarının materialları imtahan veriləcək testlərin siyahısına əlavə edilib. Bundan əlavə qeyd olunan imtahanların sual kitabçaları (Azərbaycan və rus bölmələri) və bəzi test tapşırıqlarının izahı internet saytında (http://tqdk.gov.az/exam/pretest/) yerləşdirilib. Sonuncu sınaq imtahanlarının materialları da eyni qaydada müvafiq bölmələrə əlavə ediləcək.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
