Bakı. Fərid Mirzəyev – APA. İnsan Hüquqları üzrə Müvəkkili (Ombudsman) Elmira Süleymanova UNİCEF-in ölkəmizdəki nümayəndəliyinin rəhbəri Andro Şilakadzeni qəbul edib.
Ombudsman Aparatının mətbuat xidmətindən APA-ya verilən məlumata görə, E. Süleymanova uşaq hüquqları üzrə ombudsmanların Avropa şəbəkəsinin (ENOC) üzvü olduğunu qonağın diqqətinə çatdırıb.
A.Şilakadze Azərbaycan Ombudsmanının əhalinin müxtəlif qruplarının, o cümlədən uşaq hüquqlarının sahəsində zəngin təcrübəyə malik olduğunu vurğulayıb.
Görüşdə Ombudsman təsisatı ilə UNİCEF arasında 2015-ci il üzrə əməkdaşlığa dair ikitərəfli müqavilə imzalanıb. Müvəkkil adıçəkilən beynəlxalq qurumla birgə Ombudsmanın Milli Preventiv Qrupunun, habelə uşaq hüquqlarının müdafiəsi sahəsində çalışan dövlət qurumlarının, hüquq-mühafizə və yerli icra hakimiyyəti orqanlarının ehtiyacların qiymətləndirilməsi və təlimlər vasitəsilə bacarıqlarının artırılmasının, Regional Mərkəzlərin və yerli QHT-lərin bu prosesə cəlb edilməsinin, uşaq hüquqlarının müdafiəsinin monitorinqinin genişləndirilməsinin nəzərdə tutulduğunu bildirib.